ஜூன் 1, 2025 முதல் இந்த ஸ்மார்ட்போன்களில் எல்லாம் வாட்ஸ்அப் ஆப் செயல்படாது; எந்தெந்த போன் தெரியுமா?
செய்தி முன்னோட்டம்
மெட்டாவிற்குச் சொந்தமான உலகளவில் பிரபலமான மெசேஜிங் தளமான வாட்ஸ்அப், ஜூன் 1, 2025 முதல் பழைய ஸ்மார்ட்போன்களில் இயங்காது என அறிவித்துள்ளது. இந்த நடவடிக்கை, காலாவதியான ஓஎஸ்களைக் கொண்ட போன்களுக்கான இணக்கத்தன்மையை படிப்படியாகக் குறைப்பதன் மூலம் பாதுகாப்பு மற்றும் செயல்திறனை மேம்படுத்துவதை நோக்கமாகக் கொண்ட வாட்ஸ்அப்பின் வழக்கமான அப்டேட்களின் ஒரு பகுதியாகும். பழைய போன்கள் இனி திறமையாக செயல்பட முடியாத சமீபத்திய அம்சங்கள் மற்றும் பாதுகாப்பு அப்டேட்களிலிருந்து பயனர்கள் பயனடைய முடியும் என்பதை உறுதிசெய்ய இந்த மாற்றம் அவசியம் என்று நிறுவனம் தெரிவித்துள்ளது. இந்த முடிவு, பழைய போன்களை இன்னும் நம்பியுள்ள உலகளவில் மில்லியன் கணக்கான பயனர்களைப் பாதிக்கும் எனத் தெரிகிறது.
பட்டியல்
வாட்ஸ்அப் சேவை நிறுத்தப்படும் போன்களின் பட்டியல்
ஐஓஎஸ் இயங்குதளத்தில், ஐஓஎஸ் 15 அல்லது அதற்கு முந்தைய பதிப்புகளில் இயங்கும் ஐபோன்களில் வாட்ஸ்அப் செயல்படுவதை நிறுத்தும். இதில் ஐபோன் 5எஸ், ஐபோன் 6, 6 பிளஸ், 6எஸ் சீரீஸ் மற்றும் முதல் தலைமுறை ஐபோன் எஸ்இ போன்ற மாடல்களும் அடங்கும். ஐஓஎஸ் 16 அல்லது அதற்கு மேற்பட்ட பதிப்புகளுக்கு மேம்படுத்த முடியாத பயனர்கள் வாட்ஸ்அப்பை இனி தங்கள் மொபைல்களில் பயன்படுத்த முடியாது. இதேபோல் ஆண்ட்ராய்டு 5.0 அல்லது அதற்கு முந்தைய பதிப்புகளில் இயங்கும் சாதனங்களைக் கொண்ட ஆண்ட்ராய்டு பயனர்களும் பாதிக்கப்படுவார்கள். இதில் சாம்சங் கேலக்சி எஸ்4, கேலக்சி நோட் 3, சோனி எக்ஸ்பீரியா இசட்1, எல்ஜி ஜி2, மற்றும் முதல் தலைமுறை மோட்டோ ஜி மற்றும் மோட்டோ இ ஆகியவை அடங்கும்.
அறிவுறுத்தல்
பயனர்களுக்கு அறிவுறுத்தல்
சேவை இடையூறுகளைத் தவிர்க்க, பயனர்கள் ஐஓஎஸ் 16+ அல்லது ஆண்ட்ராய்டு 6.0+ ஓஎஸ் மூலம் இயங்கும் புதிய ஸ்மார்ட்போன்களுக்கு மாறுமாறு கேட்டுக் கொள்ளப்படுகிறார்கள். மாற்றத்தின் போது மெசேஜ்கள் மற்றும் மீடியாக்களைப் பாதுகாக்க ஐகிளவுட் அல்லது கூகுள் டிரைவ் வழியாக சாட் ஹிஸ்டரியை காப்பி செய்து வைக்கவும் அறிவுறுத்தப்படுகிறது.