கோடிங் தெரிந்தவர்கள் மாற்று வேலையைத் தேடுவது நல்லது! சோஹோ ஸ்ரீதர் வேம்புவின் எச்சரிக்கை! ஏஐயால் தகவல் தொழில்நுட்பத் துறை மாறப்போகிறதா?
செய்தி முன்னோட்டம்
செயற்கை நுண்ணறிவு (ஏஐ) தொழில்நுட்பம் நாளுக்கு நாள் அசுர வேகத்தில் வளர்ந்து வருகிறது. குறிப்பாக, கோடிங் துறையில் ஏஐயின் ஆதிக்கம் அதிகரித்துள்ளது. சமீபத்தில் ஆந்த்ரோபிக் (Anthropic) நிறுவனத்தின் 'கிளாட் ஓபஸ் 4.6' (Claude Opus 4.6) மாடல், ஆரம்பத்திலிருந்தே ஒரு முழுமையான சி-கம்பைலரை (C compiler) உருவாக்கியுள்ளது. இது ஒரு சாதாரண பொறியியல் சாதனை அல்ல என்று ஐடி துறையினர் வியக்கின்றனர். இந்தச் சூழலில், இந்தியாவின் முன்னணி மென்பொருள் நிறுவனமான சோஹோ (Zoho) நிறுவனத்தின் இணை நிறுவனர் ஸ்ரீதர் வேம்பு, மென்பொருள் பொறியாளர்களின் எதிர்காலம் குறித்த தனது முக்கியக் கருத்தைப் பகிர்ந்துள்ளார்.
ஸ்ரீதர் வேம்பு
ஸ்ரீதர் வேம்புவின் அதிரடி கருத்து
எக்ஸ் தளத்தில் இது குறித்துப் பதிவிட்டுள்ள ஸ்ரீதர் வேம்பு, மென்பொருள் எழுதுவதை மட்டுமே வாழ்வாதாரமாகக் கொண்டவர்கள் மாற்றுத் தொழில்களைப் பற்றிச் சிந்திக்கத் தொடங்குவது சிறந்தது என்று கூறியுள்ளார். "இதை நான் பீதியுடன் சொல்லவில்லை, மாறாக இந்த மாற்றத்தை அமைதியாக ஏற்றுக்கொள்கிறேன். இதிலிருந்து நானும் விதிவிலக்கல்ல" என்று அவர் குறிப்பிட்டுள்ளார். அனிஷ் மூன்கா என்ற பயனர், தனக்கு கோடிங் தெரியாவிட்டாலும் ஏஐ உதவியுடன் ஒரே வாரத்தில் 'பகவத் கீதை' செயலியை உருவாக்கியதைச் சுட்டிக்காட்டிய வேம்பு, ஏஐயின் உற்பத்தித்திறன் எந்த அளவிற்கு உயர்ந்துள்ளது என்பதை விளக்கினார்.
எதிர்காலம்
எதிர்காலம் எப்படி இருக்கும்?
ஏஐ புரட்சியால் பொருளாதாரம் மற்றும் வேலைவாய்ப்புகள் எப்படி மாறும் என்பது குறித்து பின்வரும் இரண்டு விதமான பார்வைகளை அவர் முன்வைக்கிறார்: நேர்மறையான பார்வை: தொழில்நுட்பம் மனிதர்களின் கடின உழைப்பைக் குறைத்து, பின்னணிக்குச் செல்லும். இதனால் மனிதர்கள் வாழ்க்கையின் மற்ற அம்சங்களில் அதிக கவனம் செலுத்த முடியும். இது எலான் மாஸ்க் போன்றவர்கள் முன்மொழியும் எதிர்காலத்தைப் போன்றது. எதிர்மறையான பார்வை: அதிகாரங்கள் ஓரிடத்தில் குவிந்து, ஒருவிதமான கட்டுப்படுத்தப்பட்ட (Dystopian) சூழல் உருவாக வாய்ப்புள்ளது.
பயம்
கோடர்கள் பயப்பட வேண்டுமா?
கோடிங் எழுதும் முறை மாறினாலும், தொழில்நுட்பத்தை எவ்வாறு கையாள்வது என்ற அறிவு மிக அவசியமானது என்று பல வல்லுநர்கள் கருதுகின்றனர். ஸ்ரீதர் வேம்புவின் கருத்துப்படி, வெறும் மென்பொருள் எழுதுபவர்களாக (Coders) இருக்காமல், பிரச்சனைகளுக்குத் தீர்வு காண்பவர்களாகவும் (Problem Solvers), ஏஐயைப் பயன்படுத்தத் தெரிந்தவர்களாகவும் மாற வேண்டியது காலத்தின் கட்டாயமாகும்.