டெவலப்பர்கள் மாநாட்டில் ஓபன்ஏஐ நிறுவனம் வெளியிட்ட முக்கிய அறிமுகங்கள் மற்றும் அறிவிப்புகள்
செய்தி முன்னோட்டம்
சாட்ஜிபிடியை உருவாக்கிய ஓபன்ஏஐ நிறுவனம், நேற்று முதல் முறையாக டெவலப்பர்கள் மாநாட்டு நிகழ்வு ஒன்றை நடத்தி முடித்திருக்கிறது. இந்த நிகழ்வில் புதிய அறிவிப்புகள் மற்றும் அறிமுகங்கள் பலவற்றையும் அறிவித்திருக்கிறது அந்நிறுவனம்.
கடந்த 2022ம் ஆண்டு நவம்பர் மாதம் தான் சாட்ஜிபிடியை முதன்முதலில் வெளியிட்டது ஓபன்ஏஐ. வெளியாகி இரண்டு மாதங்களிலேயே 100 மில்லியன் பயனாளர்களைக் கடந்து சாதனை படைத்திருந்தது அந்த சாட்பாட்.
மேலும், சாட்ஜிபிடி தொடர்பான புதிய API-களைக் கட்டமைக்க இரண்டு மில்லியன் டெவப்பர்களையும் சாட்ஜிபிடி ஈர்த்ததாக நேற்றைய டெவலப்பர்கள் மாநாட்டில் பதிவு செய்திருக்கிறார் ஓபன்ஏஐ சிஇஓ சாம் ஆல்ட்மேன்.
ஓபன்ஏஐ
ஓபன்ஏஐயின் புதிய அறிவிப்புகள்:
நேற்றைய நிகழ்வில் புதிய மேம்படுத்தப்பட்ட செயற்கை நுண்ணறிவு சாட்பாட்டாக ஜிபிடி-4 டர்போ மாடலை வெளியிட்டது ஓபன்ஏஐ. இத்துடன் பல்வேறு புதிய API-களையும் அந்நிறுவனம் அறிமுகப்படுத்தியிருக்கிறது.
டெவலப்பர்கள் தங்களுடைய தயாரிப்புகளின், ஓபன்ஏஐயின் டெக்ஸ்ட்-டூ-இமேஜ் மாடலான டால்-இ 3யை பயன்படுத்திக் கொள்ளும் வகையில் புதிய API-யை வெளியிட்டிருக்கிறது அந்நிறுவனம்.
மேலும், டால்-இ 3யை முதற்கட்டமாக சாட்ஜிபிடி மற்றும் பிங் சாட் சாட்பாட்களிலும் அறிமுகப்படுத்தவிருப்பதாகத் தெரிவித்திருக்கிறது ஓபன்ஏஐ.
டால்-இ 3 வசதியைப் பயன்படுத்திக் கொள்ள ஒரு புகைப்பட உருவாக்கத்துக்கு 0.04 டாலர்களை (இந்திய மதிப்பில் 3.33 ரூபாய்) கட்டணமாக நிர்ணயித்திருக்கிறது அந்நிறுவனம்.
செயற்கை நுண்ணறிவு
தனிப்பட்ட சாட்ஜிபிடி பதிப்புகள் உருவாக்கம்:
செயற்கை நுண்ணறிவு சாட்பாட் சேவையில் புதிய திட்டமாக, யார் வேண்டுமானாலும் தங்களுக்கு பிடித்த வகையிலான சாட்ஜிபிடி பதிப்புகளை உருவாக்க முடியும் வகையிலான வசதியை அளிப்பதாக அறிவித்திருக்கிறது ஓபன் ஏஐ.
இப்படி சாட்ஜிபிடியின் தனிப்பட்ட பதிப்புகளை உருவாக்க கோடிங் அறிவு தேவையில்லை, 'யார் வேண்டுமானாலும்' அதனை உருவாக்க முடியும் என்பது தான் அதன் சிறப்பம்சம்.
ஆம், நம்முடைய தனிப்பதிப்பு சாட்ஜிபிடி சாட்பாட் எப்படி இருக்க வேண்டும், என்ன வகையான பயன்பாட்டிற்காக அதனை உருவாக்குகிறோம் போன்ற தகவல்களை மட்டும் நாம் அளித்தால் போதும், சாட்ஜிபிடியே நமக்கா தனிப்பதிப்பு சாட்பாட்டை உருவாக்கிக் கொடுக்குமாம்.
சாட்ஜிபிடி
சாட்ஜிபிடி மூலம் பயனாளர்களுக்கு வருவாய்?
மேற்கூறிய வகையில் நாம் உருவாக்கும் தனிப்பதிப்பு சாட்ஜிபிடி சாட்பாட்டை நாம் மட்டும் பயன்படுத்தலாம் அல்லது பிறரது பயன்பாட்டிற்காக சாட்ஜிபிடி உருவாக்கியிருக்கும் பட்டியலிலும் பட்டியலிடலாம்.
நாம் உருவாக்கிய தனிப்பதிப்பு சாட்ஜிபிடி சாட்பாட்டை பிற பயனாளர்களும் பயன்படுத்தும் நிலையில், அதற்கான வருவாயையும் பகிர்ந்து கொள்ளவிருப்பதாக அறிவித்திருக்கிறது ஓபன்ஏஐ நிறுவனம்.
மொத்தத்தில், செயற்கை நுண்ணறிவு சாட்பாட்களின் பயன்பாட்டை ஓபன்ஏஐ நிறுவனம் அடுத்த கட்டத்திற்கு எடுத்துச் சென்றிருக்கிறது என்பது மட்டும் உறுதி.
ஆனால், எதன் அடிப்படையில் அதன் வருவாய்ப் பகிர்வு இருக்கும், அனைவரும் உருவாக்கும் வகையிலான தனிப்பதிப்பு சாட்பாட் வசதி எப்படி இருக்கும் என்பதைப் பொருத்திருந்து தான் பார்க்க வேண்டும்.