ஃபேஸ்புக், இன்ஸ்டாகிராம் பயன்படுத்தும் மக்கள் எண்ணிக்கை சரிவு! 20 மில்லியன் பேர் விலகியது ஏன்?
செய்தி முன்னோட்டம்
மெட்டா நிறுவனம் தனது 2026 ஆம் ஆண்டின் முதல் காலாண்டு நிதி முடிவுகளை அண்மையில் வெளியிட்டது. இதில் இன்ஸ்டாகிராம், ஃபேஸ்புக், மெசஞ்சர் மற்றும் வாட்ஸ்அப் ஆகிய செயலிகளை உள்ளடக்கிய மெட்டாவின் 'ஃபேமிலி டெய்லி ஆக்டிவ் பீப்பிள்' (DAP) எண்ணிக்கை கடந்த ஆண்டுடன் ஒப்பிடுகையில் 4 சதவீதம் அதிகரித்துள்ளது. இருப்பினும், முந்தைய காலாண்டுடன் ஒப்பிடுகையில் மார்ச் மாதத்தில் சுமார் 2 கோடி (20 மில்லியன்) தினசரி பயனர்களை மெட்டா இழந்துள்ளதாகத் தகவல்கள் தெரிவிக்கின்றன. ஈரானில் ஏற்பட்ட இணைய இடையூறுகள் மற்றும் ரஷ்யாவில் வாட்ஸ்அப் பயன்பாட்டிற்கு விதிக்கப்பட்ட கட்டுப்பாடுகள் இந்தச் சரிவிற்கு முக்கியக் காரணங்களாகக் கூறப்படுகிறது.
குறைந்த தரம்
குறைந்த தரத்திலான உள்ளடக்கமும் பயனர்களின் வெளியேற்றமும்
மெட்டா செயலிகளில் பயனர்களின் எண்ணிக்கை குறைந்ததற்கு, சமூக வலைதளப் பக்கங்களில் காட்டப்படும் உள்ளடக்கங்களின் (Feeds) தரம் குறைந்து வருவதும் ஒரு முக்கியக் காரணமாகக் கருதப்படுகிறது. குறிப்பாக, தேவையற்ற மற்றும் தரம் குறைந்த பதிவுகள் பயனர்களின் பக்கங்களில் அதிகம் தோன்றுவது அவர்களை அதிருப்தி அடையச் செய்துள்ளதாக ஆய்வுகள் தெரிவிக்கின்றன. இதனைச் சரிசெய்யும் விதமாக, மெட்டா நிறுவனம் தனது செயற்கை நுண்ணறிவு (ஏஐ) தொழில்நுட்பத்திற்காக இந்த ஆண்டு சுமார் 10 பில்லியன் டாலர் கூடுதல் முதலீடு செய்யத் திட்டமிட்டுள்ளது. தரமான உள்ளடக்கத்தை வழங்குவதன் மூலமே பயனர்களைத் தக்கவைக்க முடியும் என்பதை உணர்ந்து நிறுவனம் இந்த நடவடிக்கைகளை எடுத்து வருகிறது.
இன்ஸ்டாகிராம்
இன்ஸ்டாகிராம் அல்காரிதத்தில் கொண்டு வரப்பட்டுள்ள மாற்றங்கள்
பயனர்களின் அனுபவத்தை மேம்படுத்தும் நோக்கில், இன்ஸ்டாகிராம் தனது பரிந்துரை அல்காரிதத்தில் (Recommendation Algorithm) அதிரடி மாற்றங்களைச் செய்துள்ளது. இதன்படி, மற்றவர்களிடமிருந்து திருடப்பட்ட அல்லது எந்தவித கூடுதல் மதிப்பும் சேர்க்கப்படாத 'அசல் அல்லாத' (Unoriginal Content) பதிவுகளின் பரவல் (Reach) இனி குறைக்கப்படும். இத்தகைய பதிவுகள் தேடல் முடிவுகளில் பின்னுக்குத் தள்ளப்படும் என்றும் அறிவிக்கப்பட்டுள்ளது. இதன் மூலம் உண்மையான படைப்பாளர்களின் பதிவுகளுக்கு முன்னுரிமை வழங்க இன்ஸ்டாகிராம் முடிவு செய்துள்ளது.
போலி செய்திகள்
போலி செய்திகள் மற்றும் கிளிக்-பெயிட் தளங்களுக்குக் கட்டுப்பாடு
புதிய மாற்றங்களின்படி, வெளிப்படையான ஆசிரியர் விவரங்கள் இல்லாத செய்திகள் மற்றும் அதிகப்படியான 'கிளிக்-பெயிட்' (Click-bait) யுக்திகளைப் பயன்படுத்தும் இணையதளங்களின் இணைப்புகள் இனி குறைவான பயனர்களுக்கே காட்டப்படும். இன்ஸ்டாகிராமிலிருந்து மட்டும் அதிகப்படியான கிளிக்குகளைப் பெறும் சந்தேகத்திற்குரிய இணையதளங்களின் தரவரிசையையும் குறைக்க மெட்டா திட்டமிட்டுள்ளது. இந்த நடவடிக்கைகள் மூலம் சமூக வலைதளங்களில் பரவும் போலித் தகவல்களைக் கட்டுப்படுத்தவும், நம்பகமான செய்திகளைப் பயனர்களுக்கு வழங்கவும் மெட்டா நிறுவனம் முயற்சி மேற்கொண்டு வருகிறது.