இந்தியாவை அதிகம் குறிவைத்து தொடுக்கப்பட்ட 'ஹேக்டிவிஸ்ட்' சைபர் தாக்குதல்கள்
செய்தி முன்னோட்டம்
நடப்பு ஆண்டின் முதல் காலாண்டில் உலகளவில் ஹேக்டிவிஸ்ட் சைபர் தாக்குதல் அதிகரித்திருப்பதாகத் தெரிவித்திருக்கிறது, சிங்கப்பூரைத் தலைமையகமாகக் கொண்டு செயல்பட்டு வரும் கிளவுட்செக் என்ற சைபர் பாதுகாப்பு நிறுவனம்.
சமூக காரணங்களுக்காக மேற்கொள்ளப்படும் ஹேக்கிங்குகள் ஹேக்டிவிஸ்ட் (Hacktivist) நிகழ்வுகள் எனப்படுகின்றன. உளகளவில் இது போன்ற நிகழ்வுகள் அதிகரித்திருந்தாலும், இந்தியாவே பல்வேறு தாக்குதல்களின் முக்கிய இலக்காக இருந்திருக்கிறது.
தொடர்ந்து அதிகரித்து வந்த ஹேக்டிவிஸ்ட் நிகழ்வுகள், கடந்த ஏப்ரல் மாதம் 35% வரை அதிகரித்திருக்கிறது. 2021 முதல் 2023 வரை 67 நாடுகளைக் குறிவைத்து ஹேக்டிவிஸ்ட் தாக்குதல்கள் நிகழ்த்தப்பட்டிருக்கின்றன.
இதுவரை நடைபெற்ற தாக்குதல்களில், அதிகளவிலான தாக்குதல்கள் இந்தியாவே குறிவைத்தே நடத்தப்பட்டிருக்கின்றன. அதனைத் தொடர்ந்து, இஸ்ரேல், போலாந்து, ஆஸ்திரேலியா, பாகிஸ்தான் மற்றும் பிற உலக நாடுகள் தாக்குதலுக்கு ஆளாகியிருக்கின்றன.
சைபர் தாக்குதல்
என்ன காரணத்தால் அதிகளவில் ஹேக்டிவிஸ்ட் தாக்குதலுக்கு ஆளாகியிருக்கிறது இந்தியா?
ஹேண்டிவிஸ்ட் தாக்குதல்கள் நடத்தப்பட்ட நாடுகளில், இந்தியா, இஸ்ரேல், டென்மார்க் மற்றும் சுவீடன் ஆகிய நாடுகளில் மதத்தினை காரணமாக வைத்து இந்த சைபர் தாக்குதல்கள் நிகழ்த்தப்பட்டிருக்கின்றன.
போலாந்து, உக்ரைன் மற்றும் லாட்வியா ஆகிய நாடுகளில் அரசியல் பிரச்சினைகளைக் காரணமாக வைத்து ஹேக்டிவிஸ்ட் தாக்குதல்கள் நிகழ்த்தப்பட்டிருக்கின்றன.
இவ்வகையான தாக்குதல்களில் அதிகம் பாதிக்கப்பட்டது அரசு நிறுவனங்கள் தான். அதனைத் தொடர்ந்து லாப நோக்கமற்ற நிறுவனங்கள், கல்வி நிறுவனங்கள், ஆட்டோமொபைல் மற்றும் நிதிச் சேவை வழங்கும் நிறுவனங்கள் அதிகம் பாதிக்கப்பட்டிருக்கின்றன.
இந்த ஹேக்டிவிஸ்ட் தாக்குதல்களால் பாதிகப்பட்ட நிறுவனங்கள் தகவல் இழப்பு, நிதி இழப்பு மற்றும் சேவைத் தடை உள்ளிட்ட பிரச்சினைகளைத் சந்தித்திருப்பதாகக் குறிப்பிட்டிருக்கிறது கிளவுட்செக் சைபர் பாதுகாப்பு நிறுவனம்.