போட்டோகிராபர் இனி தேவையில்லை? மொபைல் போட்டோவை ஸ்டுடியோ ஷாட்டாக மாற்றும் கூகுள் Pomelli AI அறிமுகம்
செய்தி முன்னோட்டம்
செயற்கை நுண்ணறிவு (ஏஐ) பந்தயத்தில் கூகுள் சற்று பின்தங்கியிருப்பதாகக் கருதப்பட்ட நிலையில், தற்போது Pomelli என்ற பெயரில் ஒரு அதிரடியான மார்க்கெட்டிங் கருவியை கூகுள் லேப்ஸ் அறிமுகப்படுத்தியுள்ளது. இதன் மூலம் ஒரு சாதாரண மொபைல் போனில் எடுக்கப்பட்ட பொருளின் புகைப்படத்தை, ஒரு சில நிமிடங்களில் உயர்தர ஸ்டுடியோவில் எடுக்கப்பட்ட விளம்பரப் படம் போல மாற்ற முடியும். இந்தத் தொழில்நுட்பம் தற்போது வணிக ரீதியான போட்டோகிராபி மற்றும் ஸ்டுடியோ வேலைகளுக்குப் பெரும் சவாலாக உருவெடுத்துள்ளது.
புரொபஷனல் லுக்
ஸ்டுடியோ இல்லாமலே புரொபஷனல் லுக்
சிறு வணிகர்கள் மற்றும் கிரியேட்டர்களுக்காக உருவாக்கப்பட்ட இந்த Pomelli பிளாட்ஃபார்மில் உள்ள போட்டோஷூட் அம்சம், மிகவும் எளிமையாக செயல்படுகிறது: பிசினஸ் டிஎன்ஏ: உங்கள் வணிகத்தின் தன்மையைப் புரிந்துகொண்டு அதற்கு ஏற்ற பின்னணியை ஏஐ அமைக்கிறது. நானோ பனானா தொழில்நுட்பம்: கூகுளின் அதிநவீன நானோ பனானா இமேஜ் ஜெனரேஷன் தொழில்நுட்பத்தைப் பயன்படுத்தி, சாதாரண படத்தை செதுக்கி மெருகூட்டுகிறது. நேரம் மற்றும் பண மிச்சம்: இனி விளம்பரங்களுக்காக ஏஜென்சிகளைத் தேடவோ, ஸ்டுடியோ வாடகை கொடுக்கவோ தேவையில்லை. உங்கள் போன் புகைப்படமே போதுமானது.
வேலைவாய்ப்புகள்
வேலைவாய்ப்புகளில் ஏற்படும் தாக்கம்
இந்தத் தொழில்நுட்பத்தின் வருகை வணிகப் புகைப்படக் கலைஞர்கள் மற்றும் எடிட்டர்கள் மத்தியில் கலக்கத்தை ஏற்படுத்தியுள்ளது. "ஒரு காலத்தில் பல மணிநேரம் செலவழித்துச் செய்யப்பட்ட வேலைகளை, இன்று ஏஐ சில நொடிகளில் செய்கிறது" என்று தொழில்நுட்ப வல்லுநர்கள் கருத்து தெரிவிக்கின்றனர். இதனால் விளம்பரத் துறையில் உள்ள ஆரம்பக்கட்ட வேலைவாய்ப்புகள் குறைய வாய்ப்புள்ளதாக அஞ்சப்படுகிறது. இருப்பினும், ஆக்கப்பூர்வமான புதிய ஐடியாக்களுக்கு மனித உழைப்பு என்றும் தேவைப்படும் என்றும் ஒரு தரப்பினர் வாதிடுகின்றனர்.
கூகுள்
கூகுளின் அதிரடி கம்பேக்
ஓபன்ஏஐ மற்றும் ஆந்த்ரோபிக் போன்ற நிறுவனங்களுக்குப் போட்டியாக, கூகுள் கடந்த சில மாதங்களில் அடுத்தடுத்து பல சக்திவாய்ந்த ஏஐ கருவிகளை வெளியிட்டு வருகிறது. அந்த வரிசையில் இணைந்துள்ள இந்த போட்டோஷூட் அம்சம், வெறும் பரிசோதனை முயற்சி மட்டுமல்லாமல், நிஜ உலகில் வணிகங்களுக்குப் பெரும் லாபத்தைத் தரும் ஒரு கருவியாகப் பார்க்கப்படுகிறது. சாதாரண மக்களும் விளம்பரத் தரத்தில் படங்களை உருவாக்க முடியும் என்பது டிஜிட்டல் உலகில் ஒரு புதிய புரட்சியாக இருக்கும் என்று எதிர்பார்க்கப்படுகிறது.