'பார்டு AI'-யின் மேம்பட்ட வடிவமான 'ஜெமினி AI'-யின் வெளியீட்டைத் தள்ளி வைத்திருக்கும் கூகுள்
செய்தி முன்னோட்டம்
செயற்கை நுண்ணறிவுத் தொழில்நுட்ப போட்டியில் தற்போது முன்னணியில் இருக்கும் ஓபன்ஏஐ நிறுவனத்துடன் சரிசமமாகப் போட்டியிட்டு வருகிறது கூகுள்.
முதன்முதலாக சாட்ஜிபிடியின் (ஜிபிடி-3.5) அறிமுகத்துடன், தொழில்நுட்ப உலகில் செயற்கை நுண்ணறிவுக் கருவிகளுக்கான போட்டியைத் தொடங்கி வைத்தது ஓபன்ஏஐ நிறுவனம்.
அதனைத் தொடர்ந்து சாட்ஜிபிடிக்குப் போட்டியாக தங்களுடைய பார்டு AI-யைக் களமிறங்கியது கூகுள். அதுமட்டுமில்லாமல் தங்களுடைய இன்னபிற AI கருவிகள் மற்றும் தொழில்நுட்பங்களையும் கடந்த மே மாதம் நடைபெற்ற தங்களுடைய வருடாந்திர நிகழ்வான I/O நிகழ்வில் அறிமுகப்படுத்தியது கூகுள்.
சாட்ஜிபிடிக்குப் பிறகு ஜிபிடி-4, அதனைத் தொடர்ந்து சில வாரங்களுக்கு முன்பு ஜிபிடி-4 டர்போ என மிகவும் மேம்படுத்தப்பட்ட AI மாடல்களை வெளியிட்டுவிட்டது ஓபன்ஏஐ. ஆனால், அதற்கு இணையான வேறு AI மாடல்களை கூகுள் இன்னும் வெளியிடவில்லை.
கூகுள்
கூகுளின் ஜெமினி AI:
பார்டு AI-யின் மேம்பட்ட வடிவமாக, ஓபன்ஏஐயின் ஜிபிடி-4 சாட்பாட் மாடலுக்குப் போட்டியாக கூகுள் உருவாக்கி வந்த சாட்பாட் மாடலே ஜெமினி AI.
இந்தாண்டு மே மாதம் நடைபெற்ற I/O நிகழ்வில் இந்த ஜெமினி AI குறித்த அறிமுகத்தைக் கொடுத்த, இந்த நவம்பர் மாதம் அதனை வெளியிடவிருப்பதாகவும் அறிவித்திருந்தது கூகுள். ஆனால், நவம்பரே முடியவிருக்கும் நிலையில் அதுகுறித்த மேலதிக் அறிவிப்புகள் கூகுளிடமிருந்து இல்லை.
இந்நிலையில் தான் தற்போது, ஜெமினி AI மாடலின் வெளியீட்டை 2024ம் ஆண்டின் முதல் காலாண்டிற்கு அந்நிறுவனம் தள்ளி வைத்திருப்பதாகத் தகவல் வெளியாகியிருக்கிறது.
பார்டைப் போல டெக்ஸ்டை மட்டும் அடிப்படையாகக் கொண்டிருக்காமல், புகைப்படங்களை உருவாக்கும் திறனையும் ஜெமினி AI கொண்டிருக்கவிருப்பது குறிப்பிடத்தக்கது.