ஃபின்டெக் துறையில் 500 சதவீத வளர்ச்சி கண்ட ஸ்டார்ட்அப்; பிரதமர் மோடி பேச்சு
உலகிலேயே இணையற்ற வேகம் மற்றும் அளவுடன் இந்தியா ஃபின்டெக் எனப்படும் நிதித் தொழில்நுட்பத் துறையில் முன்னேறி வருவதாக பிரதமர் நரேந்திர மோடி வெள்ளிக்கிழமை (ஆகஸ்ட் 30) தெரிவித்தார். மும்பையில் நடைபெற்ற உலகளாவிய நிதி தொழில்நுட்பத் திருவிழா 2024இல் பேசிய அவர், கடந்த 10 ஆண்டுகளில் $31 பில்லியனுக்கும் அதிகமான முதலீடுகளை இந்த துறை இந்தியாவில் ஈர்த்தது மற்றும் ஸ்டார்ட்அப்கள் 500 சதவீதம் வளர்ச்சி கண்டுள்ள ஃபின்டெக் துறையை மேம்படுத்த கொள்கை அளவில் தனது அரசாங்கம் நடவடிக்கைகளை எடுத்து வருவதாக கூறினார். இந்தியாவில் ஃபின்டெக் துறை ஏற்படுத்திய மாற்றத்தின் சமூக தாக்கத்தை குறிப்பிட்ட பிரதமர், நிதிச் சேவைகளில் கிராமங்களுக்கும் நகரங்களுக்கும் இடையே உள்ள இடைவெளியை ஃபின்டெக் குறைத்து வருகிறது என்றார்.
உலகின் மிகப்பெரிய மைக்ரோ ஃபைனான்ஸ் திட்டம்
உலகின் மிகப்பெரிய மைக்ரோ ஃபைனான்ஸ் திட்டமான பிரதான் மந்திரி முத்ரா யோஜனா திட்டத்தின் கீழ் ₹27 லட்சம் கோடிக்கு மேல் கடன் வழங்கப்பட்டுள்ளது என்றும், மலிவான மொபைல் டேட்டா மற்றும் 53 கோடிக்கும் அதிகமான ஜீரோ பேலன்ஸ் ஜன்தன் கணக்குகள் வளர்ச்சிக்குக் காரணம் என்றும் பிரதமர் மோடி கூறினார். ஜன்தன் யோஜனா திட்டம் தொடங்கப்பட்டு 10 ஆண்டுகளை நிறைவு செய்த நிலையில், இது பெண்களுக்கு அதிகாரமளிக்கும் ஊடகமாக மாறியுள்ளது என்று மேலும் கூறினார். கடந்த 10 ஆண்டுகளில் தனது தலைமையின் கீழ் ஃபின்டெக் வளர்ச்சியைப் பற்றி பேசிய பிரதமர் மோடி, 18 வயது அல்லது அதற்கு மேற்பட்ட வயதுடைய எந்த இந்தியரும் இன்று டிஜிட்டல் அடையாளம் இல்லாமல் இல்லை என்று கூறினார்.
