ஒரே வருடத்தில் 6 லட்சத்திற்கு இட்லி வாங்கி இருக்கும் ஹைதராபாத் ஆசாமி
செய்தி முன்னோட்டம்
நேற்று உலக இட்லி தினம் கொண்டாடப்பட்டது. அந்த நாளை போற்றும் விதமாக, உணவு டெலிவரி பார்ட்னராக ஸ்விக்கி ஒரு அறிக்கையை வெளியிட்டிருந்தது.
அதில், ஹைதராபாத்தைச் சேர்ந்த இட்லி பிரியர் ஒருவர், கடந்த வருடத்தில் மட்டும், 6 லட்ச ரூபாய்க்கு இட்லி ஆர்டர் செய்துள்ளார் என தெரிவிக்கப்பட்டுள்ளது. இந்த நபர், சென்னை மற்றும் பெங்களூரு ஆகிய நகரங்களில் வசிக்கும் தனது நண்பர்கள் மற்றும் குடும்பத்தாருக்கும், 8,428 இட்லிகளை ஆர்டர் செய்துள்ளாராம்.
மார்ச் 30, 2022 முதல் மார்ச் 25, 2023 வரையிலான ஆர்டர்களில் இருந்து இந்த அறிக்கை தயார் செய்யப்பட்டுள்ளது.
ஸ்விக்கி அறிக்கை
தென்னிந்தியாவில் அதிகம் ஆர்டர் செய்யப்பட்ட உணவு இட்லி
அதுமட்டுமின்றி, சென்னை, ஹைதராபாத், பெங்களூர், கோயம்புத்தூர் மற்றும் மும்பையை சேர்ந்த பயனர்கள், பெரும்பாலும் காலை 8 மணி முதல் 10 மணி வரை இட்லியை தேர்வு செய்வதாகவும், பல நேரங்களில் இரவு உணவிற்காகவும் இட்லிகளை ஆர்டர் செய்துள்ளதாக அந்த ஆய்வறிக்கை மேலும் தெரிவிக்கிறது.
பெங்களூரு, ஹைதராபாத் மற்றும் சென்னை ஆகிய நகரங்கள் தான், இட்லிகளை அதிகம் ஆர்டர் செய்யும் டாப் 3 நகரங்கள் ஆகும்.
இட்லிக்கு அடுத்தபடியாக, ரவா இட்லி பெங்களூரில் அதிகம் ஆர்டர் செய்யப்பட்டுள்ளது. அதே போல, நெய் இட்லி மற்றும் நெய் கார பொடி இட்லி தமிழ்நாடு, ஆந்திரா மற்றும் தெலுங்கானாவில் பிரபலமாக ஆர்டர் செய்யப்பட்டது.