குழந்தை பிறந்த ஒரு ஆண்டிற்குப் பின் அப்பாக்களுக்கு வரும் ஆபத்து! ஆண்கள் சந்திக்கும் போஸ்ட்பார்டம் டிப்ரஷன்; முழு விவரங்கள்
செய்தி முன்னோட்டம்
பொதுவாகப் பிரசவத்திற்குப் பிந்தைய மனச்சோர்வு என்பது பெண்களை மட்டுமே பாதிக்கும் ஒரு விஷயமாகப் பார்க்கப்படுகிறது. ஹார்மோன் மாற்றங்கள், தூக்கமின்மை மற்றும் உடல் ரீதியான சோர்வு காரணமாகத் தாய்மார்கள் இந்த அழுத்தத்திற்கு உள்ளாகிறார்கள். ஆனால், சமீபத்திய ஆய்வுகள் தந்தைமார்களும் இத்தகைய மனநல பாதிப்புகளுக்கு அதிகளவில் ஆளாவதாகத் தெரிவிக்கின்றன. குறிப்பாக, 10 லட்சத்திற்கும் அதிகமான ஸ்வீடிஷ் தந்தைமார்களைக் கொண்டு நடத்தப்பட்ட ஆய்வில், குழந்தை பிறந்த ஒரு ஆண்டிற்குப் பிறகுதான் ஆண்களுக்கு இந்த மன அழுத்தம் உச்சத்தை எட்டுவதாகக் கண்டறியப்பட்டுள்ளது.
மன அழுத்தம்
தாமதமாகத் தாக்கும் மன அழுத்த அலை
பெண்களுக்குக் குழந்தை பிறந்த உடனேயே மனச்சோர்வு அறிகுறிகள் தென்படும் நிலையில், ஆண்களுக்கு இது ஒரு 'தாமதமான அலை' போலத் தாக்குகிறது. குழந்தை பிறந்த முதல் சில மாதங்களில் தந்தைமார்கள் உற்சாகமாகவும் நிலைத்தன்மையுடனும் காணப்பட்டாலும், குழந்தை வளர்ந்து ஓராண்டு ஆகும் நேரத்தில் அவர்களின் மன அழுத்தம் மற்றும் சோர்வு 30 சதவீதம் வரை அதிகரிப்பதாக 'JAMA Network Open' இதழில் வெளியான ஆய்வு கூறுகிறது. நிதி நெருக்கடி, உறவுகளில் ஏற்படும் மாற்றங்கள் மற்றும் தொடர்ச்சியான தூக்கமின்மை ஆகியவை காலப்போக்கில் ஒன்று திரண்டு இந்த அழுத்தத்தை உருவாக்குவதாக ஆய்வாளர் டோங்ஹாவ் லு குறிப்பிடுகிறார்.
சிக்கல்
அறிகுறிகளை மறைப்பதும் கண்டறியத் தவறுவதும்
ஆண்களுக்கு ஏற்படும் இந்த மனச்சோர்வு பெரும்பாலும் கண்டறியப்படாமல் போவதற்கு அறிகுறிகளை மறைத்தல் ஒரு முக்கிய காரணமாகும். குடும்பத்தில் தாயின் ஆரோக்கியமே முக்கியம் என்று கருதும் தந்தைமார்கள், தங்களது மனப் போராட்டங்களை வெளியே சொல்லாமல் மறைக்கின்றனர். இதனால், பிரச்சனை தீவிரமடைந்து ஒரு ஆண்டிற்குப் பிறகுதான் அது மருத்துவ ரீதியான மனச்சோர்வாக உருவெடுக்கிறது. மேலும், மருத்துவத் துறையில் தந்தைமார்களுக்கான மனநலப் பரிசோதனைகள் முறையாக இல்லாததும், அவர்கள் தங்களுக்குத் தேவையான உதவியைப் பெறத் தடையாக இருக்கிறது.
அறிகுறிகள்
ஆண்களிடம் தென்படும் தனித்துவமான அறிகுறிகள்
பெண்களுக்கு ஏற்படும் மனச்சோர்வு அறிகுறிகளில் இருந்து ஆண்களின் அறிகுறிகள் சற்று மாறுபடுகின்றன. அவர்கள் தங்களது துயரத்தை நேரடியாக வெளிப்படுத்தாமல் பின்வரும் வழிகளில் காட்டலாம்: அதிகப்படியான எரிச்சல் மற்றும் கோபம். மனைவி, குழந்தை மற்றும் நண்பர்களிடம் இருந்து விலகி இருத்தல். திடீர் மற்றும் பொறுப்பற்ற முடிவுகளை எடுத்தல். தலைவலி, வயிற்று வலி போன்ற உடல் ரீதியான உபாதைகள். பழக்க வழக்கங்களில் மாற்றம் மற்றும் போதைப் பொருட்களுக்கு அடிமையாதல்.
காரணிகள்
பாதிப்பிற்கான முக்கிய காரணிகள்
ஆண்களுக்கு ஏற்படும் இந்த பெட்டர்னல் போஸ்ட்பார்டம் டிப்ரஷன் (PPND) ஏற்படப் பல காரணங்கள் உள்ளன. டெஸ்டோஸ்டிரோன் அளவு குறைதல் போன்ற உயிரியல் மாற்றங்கள் ஒருபுறம் இருந்தாலும், மனைவியின் மனச்சோர்வு இதில் முக்கிய பங்கு வகிக்கிறது. மனைவியிடம் மனச்சோர்வு இருந்தால், 50 சதவீத தந்தைமார்களுக்கும் அது தொற்றிக்கொள்ள வாய்ப்புள்ளது. இது தவிர, ஒரு சிறந்த குடும்பத் தலைவனாக இருக்க வேண்டும் என்ற சமூக அழுத்தம் மற்றும் குழந்தையின் பராமரிப்பில் இருந்து தான் விலக்கி வைக்கப்படுவதாக உணர்வதும் ஆண்களை மனரீதியாகப் பலவீனப்படுத்துகின்றன. தந்தைமார்களின் மனநலம் என்பது அந்தக் குழந்தையின் ஆரோக்கியமான வளர்ச்சிக்கும், குடும்பத்தின் மகிழ்ச்சிக்கும் இன்றியமையாதது. மனச்சோர்வு அறிகுறிகள் தென்பட்டால் தயங்காமல் மனநல நிபுணரை அணுகி ஆலோசனை பெறுவது, ஆரோக்கியமான தந்தை-குழந்தை உறவை மேம்படுத்த உதவும்.