ஜிம்முக்கு போறீங்களா? அதிக வெயிட் தூக்குவதால் இதயத்திற்கு ஆபத்தா? மருத்துவர்கள் தரும் பகீர் எச்சரிக்கை!
செய்தி முன்னோட்டம்
உடல் வலிமைக்காகவும், தசை வளர்ச்சிக்காகவும் ஜிம்மிற்குச் சென்று அதிக எடைகளைத் தூக்குவது (Heavy Weightlifting) இன்றைய இளைஞர்களிடையே ஒரு டிரெண்டாக உள்ளது. ஆனால், ஒரு வரம்பிற்கு மேல் எடையைத் தூக்குவது இதயத்திற்கு அதிகப்படியான அழுத்தத்தைக் கொடுக்கும் என்று மருத்துவ ஆய்வுகள் எச்சரிக்கின்றன. நீங்கள் மிக அதிக எடையைத் தூக்கும்போது, உங்கள் இரத்த அழுத்தம் தற்காலிகமாக 300 mmHg என்ற அபாயகரமான அளவைத் தாண்டக்கூடும். இது தமனிகளில் சிறிய விரிசல்களை ஏற்படுத்த வாய்ப்புள்ளது.
அபாயங்கள்
கவனிக்க வேண்டிய அபாயங்கள்
அதிக எடை தூக்குவதால் ஏற்படக்கூடிய சில பாதிப்புகள் இதோ: இரத்த அழுத்த அதிகரிப்பு: வெயிட் தூக்கும்போது மூச்சைப் பிடித்துக் கொள்ளும் வல்சால்வா மேனுவர் (Valsalva Maneuver) என்ற பழக்கம், வயிற்றுப்பகுதி அழுத்தத்தை அதிகரித்து இதயத்திற்குச் செல்லும் இரத்த ஓட்டத்தைத் தற்காலிகமாகக் கட்டுப்படுத்துகிறது. இதனால் இதயம் கடினமாக உழைக்க வேண்டிய சூழல் ஏற்படுகிறது. இதய தசைகள் தடிமனாதல்: நீண்ட காலம் முறையாகத் திட்டமிடாமல் அதிகப் பளுவைத் தூக்குவது இதய தசைகளைத் தடிமனாக்கி, எதிர்காலத்தில் இதயத் துடிப்பு சீரற்ற நிலைக்கு தள்ளப்படலாம். மாரடைப்பு ஆபத்து: ஏற்கனவே உயர் இரத்த அழுத்தம் அல்லது இதயம் தொடர்பான பாதிப்புகள் உள்ளவர்கள், மருத்துவர் ஆலோசனை இன்றி அதிக எடை தூக்குவது மாரடைப்பிற்கு வழிவகுக்கும்.
உடற்பயிற்சி
பாதுகாப்பாக உடற்பயிற்சி செய்வது எப்படி?
இதயத்தைப் பாதுகாத்துக் கொண்டே தசை வலிமையைப் பெற மருத்துவர்கள் தரும் ஆலோசனைகள்: மிதமான பயிற்சி: வாரம் ஒன்றிற்கு 30 முதல் 60 நிமிடங்கள் வரை மிதமான எடையுடன் கூடிய ரெசிஸ்டன்ஸ் டிரெயினிங் செய்வது இதய நோய் அபாயத்தை 40% முதல் 70% வரை குறைப்பதாக ஆய்வுகள் தெரிவிக்கின்றன. மூச்சுப் பயிற்சி: எடையைத் தூக்கும்போது மூச்சைப் பிடித்துக் கொள்ளாமல், சீராக விட வேண்டும். இது இரத்த அழுத்தம் திடீரென உயர்வதைத் தடுக்கும். வார்ம் அப்: எந்த ஒரு கடினமான உடற்பயிற்சிக்கு முன்னும் இதயம் மற்றும் தசைகளைத் தயார்படுத்த வார்ம் அப் செய்வது மிக அவசியம்.
ஆலோசனை
மருத்துவ ஆலோசனை
உங்களுக்கு இதய நோய் குடும்பப் பின்னணி இருந்தாலோ அல்லது 40 வயதிற்கு மேற்பட்டவராக இருந்தாலோ, தீவிர வெயிட் லிஃப்டிங் செய்வதற்கு முன் ஒரு கார்டியோலஜிஸ்ட்டிடம் ஆலோசனை பெறுவது நல்லது. கட்டுப்பாடற்ற இரத்த அழுத்தம், இதய வால்வு கோளாறுகள் அல்லது தமனிகளில் வீக்கம் உள்ளவர்கள் அதிக எடைகளைத் தூக்குவதைத் தவிர்க்க வேண்டும். இவர்கள் ஏரோபிக் பயிற்சிகளுடன் கூடிய லேசான உடற்பயிற்சிகளை மேற்கொள்வதே பாதுகாப்பானது.