எந்த உள்நோக்கமும் இல்லை; தொப்புள் கொடி விவகாரத்தில் வருத்தம் தெரிவித்து யூடியூபர் இர்ஃபான் சுகாதாரத்துறைக்கு கடிதம்
பிரபல யூடியூபர் இர்ஃபான் தனது பிறந்த குழந்தையின் தொப்புள் கொடியை வெட்டிய வீடியோவைப் பகிர்ந்த பின்னர் விசாரணையில் உள்ளார். சமீபத்தில், இர்ஃபான் தனது மனைவி கருவுற்றிருந்த நிலையில், வெளிநாடு சென்று குழந்தையின் பாலினத்தை தெரிந்துகொண்டு அதை வெளிப்படுத்தியது சர்ச்சையை ஏற்படுத்தியது. இந்த சர்ச்சை ஓய்ந்த நிலையில், சமீபத்தில் மனைவியின் பிரசவம் மற்றும் குழந்தையின் தொப்புள் கொடியை அவர் வெட்டுவது போன்ற அவரது சமீபத்திய வீடியோ வைரலாகி மேலும் சர்ச்சையை கிளப்பியது. இர்பானின் நடவடிக்கைகள் தேசிய மருத்துவ வழிகாட்டுதல்களை மீறியதாக கூறப்பட்டதால், தமிழக அரசின் சுகாதாரத்துறை நடவடிக்கை எடுத்துள்ளது. மேலும், இதுதொடர்பான புகாரின் பேரில், இர்ஃபான் மீதும், பிரசவம் நடந்த சோழிங்கநல்லூரில் உள்ள தனியார் மருத்துவமனை மீதும் காவல்துறை வழக்குப் பதிவு செய்துள்ளது.
இர்பான் சார்பில் கடிதம்
விசாரணையை முன்னெடுப்பதற்காக காவல்துறை மருத்துவ ஆவணங்கள் மற்றும் வீடியோ ஆதாரங்களை பெற்றுள்ளது. தமிழக சுகாதாரத் துறை அமைச்சர் மா.சுப்பிரமணியன், இர்பானின் செயல் ஏற்றுக்கொள்ள முடியாதது என்று உறுதியாகக் கூறியதோடு, நிகழ்வைப் பதிவு செய்ய அவரை பிரசவ அறைக்குள் அனுமதித்ததற்காக மருத்துவமனை மீது அபராதம் விதிக்கப்பட்டதாக கூறியுள்ளார். மேலும், சுகாதாரத்துறை இர்பானுக்கு விளக்கம் கேட்டு நோட்டீஸ் அனுப்பியுள்ளது. இர்ஃபான் தற்போது வெளிநாட்டில் உள்ளதாகக் கூறப்படும் நிலையில், தனது உதவியாளர் மூலம், கடிதம் அனுப்பியுள்ளார். அதில் தொப்புள் கொடியை வெட்டியதில் எந்த உள்நோக்கமும் இல்லை எனக் கூறியதோடு, தனது செயலுக்கு வருத்தமும் தெரிவித்துள்ளார். எனினும், அவர் மன்னிப்பு கோரினாலும், அவர் மீது நடவடிக்கை பாயும் என சுகாதாரத் துறை அமைச்சர் மா.சுப்பிரமணியன் கூறியுள்ளது குறிப்பிடத்தக்கது.
