சைதாப்பேட்டை ரயில் நிலையத்தில் கொலை செய்யப்பட்ட பெண் வியாபாரி - 5 பேர் கைது
செய்தி முன்னோட்டம்
சென்னை ஆதம்பாக்கம் பகுதியில் வசித்து வந்தவர் ராஜேஸ்வரி(34), ரயிலில் பழ வியாபாரம் மற்றும் சமோசா விற்று வந்த இவர் கடந்த 19ம் தேதி இரவு தாம்பரத்தில் இருந்து கடற்கரை நோக்கி வந்த மின்சார ரயிலில் வியாபாரம் செய்துள்ளார்.
அப்போது சைதாப்பேட்டை ரயில் நிலையத்தில் இறங்கிய ராஜேஸ்வரியை, அதே ரயிலில் இருந்து இறங்கிய மர்ம நபர்கள் சிலர் பின்தொடர்ந்து சென்று அரிவாளால் சரமாரியாக வெட்டி கொலை செய்துவிட்டு அங்கிருந்து தப்பியோடினர் என்று கூறப்படுகிறது.
அரிவாளால் வெட்டப்பட்ட ராஜேஸ்வரியை ரயில்வே போலீசார் ராயப்பேட்டை அரசு மருத்துவமனை தீவிர சிகிச்சைப்பிரிவில் அனுமதித்துள்ளனர்.
ஆனால் அவர் சிகிச்சை பலனின்றி நேற்று முன்தினம் உயிரிழந்தார்.
கொலை
சிசிடிவி கேமரா இல்லாததால் குற்றவாளிகளை பிடிப்பதில் தாமதம்
இவருக்கு இமானுவேல்(11), சோபியா(7)உள்ளிட்ட 2 குழந்தைகள் உள்ள நிலையில், அவரது கணவன் டக்கா மணி உயிரிழந்த நிலையில் புவனேஷ் என்பவரை திருமணம் செய்துக்கொண்டு வாழ்ந்து வந்துள்ளார் என்று கூறப்படுகிறது.
முன்விரோதம் காரணமாகவே இவர் கொலை செய்யப்பட்டிருக்கலாம் என்று கூறப்பட்ட நிலையில் கொலை செய்தவர்களை கைதுச்செய்ய 3 தனிப்படைகளை காவல்துறை அமைத்தது.
சைதாப்பேட்டை ரயில்நிலையத்தில் சிசிடிவி கேமரா இல்லாததால் குற்றவாளிகளை பிடிக்க போலீசாருக்கு சற்று கடினமாக இருந்துள்ளது.
இந்நிலையில் ராஜேஸ்வரியை கொலை செய்த 5 பேரினை தனிப்படை போலீசார் தற்போது கைது செய்துள்ளார்கள் என்று தகவல்கள் வெளியாகியுள்ளது.
ராஜேஸ்வரியின் தங்கை நாகவள்ளி உள்பட ஜெகதீசன், ஜான்சன், சக்திவேல், சூர்யா ஆகியோர் கைது செய்யப்பட்டுள்ள நிலையில், அவர்களிடம் போலீசார் தீவிர விசாரணையில் ஈடுபட்டுள்ளார்கள் என்பது குறிப்பிடத்தக்கது.