உத்தரப்பிரேதேசத்தில் சொத்திற்காக கணவன், இரு மகன்களை கொன்ற பெண் - அதிர்ச்சி தகவல்
உத்தரப்பிரேதேச மாநிலம், கோரக்பூர் மாவட்டத்தில் உள்ள சஹாஜன்வான் பகுதியை சேர்ந்தவர் அவதேஷ் குப்தா. 40 வயதான இவருக்கு ஆரவ், ஆர்யன் என இரண்டு மகன்கள் உள்ளனர். அவதேஷ் குப்தாவின் மனைவி இறந்தநிலையில் கடந்த 8 மாதங்களுக்கு முன்னர் அவர் நீலம் என்னும் பெண்ணை இரண்டாவதாக திருமணம் செய்துள்ளார். அந்த பெண்ணுக்கும் ஏற்கனவே திருமணமாகி ஒரு பெண் குழந்தை இருந்துள்ளது. 2ம் திருமணத்திற்கு பிறகு அவதேஷ் குப்தா, நீலம், இரு மகன்கள், ஒரு மகள் என அனைவரும் ஒரே வீட்டில் வசித்து வந்துள்ளார்கள். இந்நிலையில் கடந்த 25ம் தேதி இரவு நீலம் காவல் நிலையத்திற்கு போன் செய்து தனது கணவன் மற்றும் மகன்களை யாரோ ஒரு மர்ம கும்பல் கொலை செய்துவிட்டதாக தகவல் அளித்துள்ளார்.
கழுத்தை அறுத்து கொடூரமாக கொலை செய்த பெண்
அதன் பேரில் அங்கு சென்ற போலீசார் கழுத்து அறுக்கப்பட்டு இறந்த கிடந்த அவதேஷ் குப்தா, அவரது 2 மகன்கள் உடலை கைப்பற்றி பிரேத பரிசோதனைக்கு அனுப்பி வைத்தனர். மேலும் நீலம் மீது போலீசாருக்கு சந்தேகம் ஏற்பட்ட நிலையில், தொடர்ந்து 8 மணி நேரம் போலீசார் அவரிடம் விசாரணை நடத்தியுள்ளார்கள். அதில் நீலம் உண்மை அனைத்தையும் கூறியுள்ளார். அவதேஷ் குப்தா தனது அனைத்து சொத்தையும் தனது மூத்த மனைவியின் பிள்ளைகளான ஆரவ் மற்றும் ஆர்யனுக்கு எழுதி வைப்பதாக கூறியுள்ளார். இதனால் ஆத்திரமடைந்த நீலம், இவர்களை கொன்றுவிட்டால் அனைத்து சொத்தும் தனது பெயருக்கு வந்துவிடும் என்று சதி திட்டம் தீட்டி இந்த கொடூர கொலைகளை செய்துள்ளார் என்பது தெரியவந்துள்ளது.
