தமிழகத்தை குப்பைத்தொட்டியாக பயன்படுத்தும் கேரளா: முதல்வர் ஏன் கண்டிக்கவில்லை, பாஜக தலைவர் கேள்வி
தமிழகத்தை குப்பைத்தொட்டியாக பயன்படுத்தும் கேரளாவை தமிழக முதலவர் ஸ்டாலின் கண்டிக்காமல் இருப்பது ஏன் என்று பாஜக தலைவர் நாராயணன் திருப்பதி கேள்வி எழுப்பியுள்ளார். இது குறித்து ட்விட்டரில் பதிவிட்டிருக்கும் பாஜக தலைவர் நாராயணன் திருப்பதி, "நேற்று (ஞாயிற்றுக்கிழமை) அதிகாலையில், தென்காசி மாவட்டம், கரும்பனூரில் கணினிகளின் உதிரி பாகங்கள், செல்போன்கள், பயன்படுத்திய பேட்டரிகள், வாகன உதிரிபாகங்கள், மருத்துவ கழிவுகள் உள்ளிட்ட பல்வேறு பொருட்கள் திறந்த வெளியில் கொளுத்தப்பட்டன." என்று தெரிவித்துள்ளார். மேலும், இதனால் அப்பகுதி மக்களுக்கு மூச்சு திணறல் உள்ளிட்ட பல்வேறு உபாதைகள் ஏற்பட்டதாகவும் அவர் தெரிவித்துள்ளார். இந்த கழிவுகள் எல்லாம் கேரள மாநிலத்தில் இருந்து தமிழகத்திற்குள் கொண்டுவரப்பட்ட கழிவுகள் என்றும் அவர் குற்றம் சாட்டியுள்ளார்.
பாஜக தலைவர் நாராயணன் திருப்பதி ட்விட்டரில் கூறி இருப்பதாவது
கழிவு மேலாண்மையில் கேரளா முதலிடம் வகிக்கிறது என்று பெருமையாக தமிழக மார்க்சிஸ்ட் கம்யூனிஸ்ட் கட்சி சொல்லி கொள்கிறது. ஆனால், கழிவுகள் அனைத்தையும் நம் தமிழகத்தில் எரித்து தமிழர்களின் உயிருக்கு உலை வைக்கிறது கேரள கம்யூனிஸ்ட் அரசு. மாவட்ட எல்லைகளில் அமைந்துள்ள போக்குவரத்து மற்றும் காவல்துறை சோதனை சாவடிகளில் உள்ள அதிகாரிகள் கண்டும் காணாமல் இருப்பது தான் இந்த அவல நிலைக்கு காரணம். சமீபத்தில் கேரளா சென்றிருந்த தமிழக முதல்வர் கேரள முதல்வரிடம் தமிழர்களை பாதிக்கும் இந்த விவகாரம் குறித்து தன் கண்டனத்தை தெரிவித்தாரா? இல்லையெனில், தமிழகத்தை தன் குப்பைத்தொட்டியாக பயன்படுத்தும் கேரளாவை கண்டிக்காதது ஏன்? என்பதை தமிழக முதல்வர் அவர்கள் விளக்க வேண்டும். என்று கூறியுள்ளார்.
