புதிய கட்டிடத்திற்கு மாறிய மக்களவை; இப்போது பழைய பாராளுமன்ற கட்டிடத்தின் நிலைமை என்ன?
செய்தி முன்னோட்டம்
நேற்று, நாடாளுமன்ற உறுப்பினர்கள் அனைவரும் சிறப்பு கூட்டத்தொடரில் கூடினர். பழைய பாராளுமன்றத்தில் நடைபெற்ற கடைசி கூட்டத்தொடர் அதுவாகும்.
பிரதமர் மோடியும், பழைய கட்டிடத்தின் வரலாறும், அதன் சிறப்புகள் மற்றும் அது இதுநாள் வரை தாங்கி நிற்கும் நினைவுகள் என பலவற்றை உறுப்பினர்களுடன் பகிர்ந்துகொண்டார்.
பாராளுமன்ற நடவடிக்கைகள் இன்று முதல் புதிய கட்டிடத்திற்கு மாற்றப்படும்.
1927 இல் கட்டிமுடிக்கப்பட்ட, தற்போது 96 வயதாகும் பழைய பாராளுமன்ற கட்டிடம் இதன் பின் என்னவாகும் என்ற கேள்வி பொதுமக்கள் மனதில் எழாமலில்லை. அதற்கு பதில் இதோ:
card 2
பழைய கட்டிடம் இடிக்கப்படாது
பிரிட்டிஷ் கட்டிடக்கலைஞர்களான சர் எட்வின் லுட்யென்ஸ் மற்றும் ஹெர்பர்ட் பேக்கர் ஆகியோரால் வடிவமைக்கப்பட்ட இந்த கட்டிடம், இந்தியாவின் சின்னமாக திகழ்கிறது.
இந்தியாவின், சுதந்திரப் போராட்டத்தை மட்டுமல்ல, அதன்பிறகு நாட்டின் எழுச்சியையும் கண்ட இந்த தொல்லியல் கட்டிடம் இடிக்கப்படாது என்றும், நாடாளுமன்ற நிகழ்வுகளுக்கு அதிக செயல்பாட்டு இடங்களை வழங்குவதற்காக இது "புதுப்பிக்கப்படும்" என்றும் செய்திகள் கூறுகின்றன.
பழைய கட்டிடத்தின் ஒரு பகுதியை அருங்காட்சியகமாக மாற்றலாம் என்றும் சில தகவல்கள் தெரிவிக்கின்றன.
புதிய பாராளுமன்ற கட்டிடம், கடந்த மே மாதம், பிரதமரால் திறந்து வைக்கப்பட்டது. இந்த பிரமாண்டமான கட்டிடத்தில், லோக்சபா அறையில் 888 உறுப்பினர்களும், ராஜ்யசபா அறையில் 300 உறுப்பினர்களும் அமரலாம். இரு அவைகளின் கூட்டுக் கூட்டத்திற்கு, 1,280 எம்.பி.க்கள் அமரக்கூடிய அறையும் இங்கே உள்ளது.