உத்திரகாண்ட் மாநிலம் - ராணுவ கட்டிடங்களில் விரிசல் என தலைமை தளபதி மனோஜ் பாண்டே தகவல்
உத்திரகாண்ட் மாநிலம், சமோலி மாவட்டத்திற்கு உட்பட்ட ஜோஷிமத், கர்ணபிரயாக் போன்ற நகரங்களில் கோயில், வீடு, ஓட்டல் உள்ளிட்ட கட்டிடங்களில் பெரியளவிலான விரிசல்கள் திடீரென ஏற்பட்டுள்ளது. இதனால் மக்கள் அச்சமடைந்த நிலையில், அவர்களை பாதுகாப்பான இடத்திற்கு அழைத்து செல்லும் பணியினை அம்மாநில அரசு தனி குழுக்களை அமைத்து மேற்கொண்டு வருகிறது. இந்த திடீர் விரிசல்கள் குறித்து இஸ்ரோ, ஐஐடி அமைப்புகளுடன் இணைந்து காரணங்களை ஆராய்ந்தும் வருவதாக கூறப்படுகிறது. இதனை தொடர்ந்து, கட்டுமான பணிகளுக்கு அங்கு தற்காலிக தடை விதிக்கப்பட்டுள்ளது. விரிசல் கண்ட கட்டிடங்களை இடிக்கவும் அரசு முடிவு செய்துள்ளதாக தெரிகிறது. எனினும், விரிசல் தொடர்ந்து பரவி வருவதால், இயற்கை பேரிடராக கூட இருக்கலாம் என கருதப்படுகிறது.
பாதுகாப்பு கருதி தற்காலிகமாக வீரர்கள் வேறு இடத்தில் தங்க வைப்பு
இது குறித்து, இந்திய ராணுவ தலைமை தளபதி மனோஜ் பாண்டே செய்தியாளர்களிடம் இன்று பேசுகையில், உத்தரகாண்டின் ஜோஷிமத் பகுதியில் 25 முதல் 28 ராணுவ கட்டிடங்கள் உள்ளன. இதிலும் தற்போது விரிசல்கள் ஏற்பட்டுள்ளது. இதன் காரணமாக, பாதுகாப்பு கருதி தற்காலிகமாக ராணுவ வீரர்கள் வேறு இடத்தில் தங்கியுள்ளார்கள். தேவைப்பட்டால் ஆலி நகரில் நிரந்தரமாக அவர்கள் தங்கவைக்கப்படுவார்கள் என்று கூறியுள்ளார். மேலும், உத்தரகாண்டின் ஜோஷிமத் பைபாஸ் சாலை பணிகள் தற்போது நிறுத்தி வைக்கப்பட்டுள்ளது. முன்கள பகுதிகளுக்கு செல்ல ராணுவ வீரர்களுக்கு எவ்வித இடையூறும் இல்லை என்பதால்,அவர்கள் செயலாற்ற தயாராகவே உள்ளார்கள் என்று தலைமை தளபதி தகவல் அளித்துள்ளார். தொடர்ந்து, உள்ளூர் நிர்வாகத்திற்கு அனைத்து உதவிகளையும் வழங்க தயாராக உள்ளதாகவும் அவர் கூறியது குறிப்பிடத்தக்கது.
