சுற்றித்திரியும் அரிக்கொம்பன் காட்டு யானையினை பிடிக்க பொதுமக்கள் கோரிக்கை
செய்தி முன்னோட்டம்
தேனி மாவட்டம் மேகமலையில் சுற்றித்திரியும் அரிக்கொம்பன் யானையினை மயக்க ஊசி போட்டு பிடிக்குமாறு வனத்துறையினருக்கு அப்பகுதி மக்கள் கோரிக்கை விடுத்துள்ளார்கள். கேரளா மாநிலம் மூணாறு பகுதியில் உள்ள சின்னக்கானலில் அரிக்கொம்பன் என்னும் காட்டு யானை சுற்றித்திரிந்தது. இதனை அப்பகுதி வனத்துறையினர் கடும் முயற்சி மேற்கொண்டு மயக்க ஊசி போட்டு பிடித்தனர். பின்னர் அதனை தேக்கடி பெரியார் புலிகள் சரணாலயத்தில் ஒப்படைத்தனர். கடந்த சில வாரத்திற்கு பிறகு அங்கிருந்து வெளியேறிய இந்த அரிக்கொம்பன் காட்டு யானை இரவங்கலாறு மற்றும் பத்துக்கோடு பகுதிக்குள் புகுந்தது என்று கூறப்படுகிறது.
யானை
உயிருக்கு பயந்து வீட்டிற்குள்ளேயே தஞ்சமடைந்துள்ள பொதுமக்கள்
இதனை தொடர்ந்து, சின்னமன்னூர் வனத்துறையினர் ரேடியோ காலர் சிக்னல் மூலம் யானையின் நடமாட்டத்தினை தொடர்ந்து கண்காணித்து வருகிறார்கள். அதன்படி பத்துக்கோடு பகுதியில் சுற்றித்திரியும் யானை ரேஷன் கடை மற்றும் வீடுகளை உடைத்து அதனுள் வைக்கப்பட்டுள்ள அரிசியினை தின்று வருகிறது என்று தெரியவந்தது. யானையின் இந்த அசாதாரண நடமாட்டத்தால் அங்கு வசிக்கும் பொது மக்கள் தங்கள் உயிருக்கு ஆபத்து ஏற்படக்கூடும் என்று பயத்தில் வீட்டின் உள்ளேயே தஞ்சம் அடைந்துள்ளார்கள். ரேஷன் கடை பணியாளர்களும் பயத்தால் பணிக்கு வருவது இல்லை என்று செய்திகள் தெரிவிக்கிறது. இத்தகைய சூழலில் அப்பகுதி மக்கள் அந்த அரிக்கொம்பன் யானையினை மயக்க ஊசி போட்டு பிடிக்குமாறு வனத்துறையினருக்கு கோரிக்கை வைத்துள்ளார்கள்.