திருவண்ணாமலை கார்த்திகை தீபத் திருவிழாவில் பக்தர்கள் மலையேற தடை
செய்தி முன்னோட்டம்
திருவண்ணாமலையில் வரும் டிசம்பர் 3 ஆம் தேதி நடைபெற உள்ள கார்த்திகை தீபத் திருவிழாவில், பக்தர்கள் அண்ணாமலையார் மலை மீது ஏறிச் சென்று தீபத்தைக் காண மாவட்ட நிர்வாகம் தடை விதித்துள்ளது. டித்வா புயல் எச்சரிக்கை மற்றும் பாறைகள் சரியும் அபாயம் குறித்து வல்லுநர் குழு அளித்த அறிக்கையின் அடிப்படையில் பக்தர்களின் பாதுகாப்புக் கருதி இந்த முடிவு எடுக்கப்பட்டுள்ளது. கடந்த ஆண்டு பெஞ்சால் புயலால் பெய்த வரலாறு காணாத கனமழையின் போது, அண்ணாமலையார் மலையில் மண் சரிவு ஏற்பட்டு, ராட்சதப் பாறை உருண்டு விழுந்ததில் ஒரே குடும்பத்தைச் சேர்ந்த 7 பேர் உயிரிழந்தனர். இதனால், கடந்த தீபத் திருவிழாவின்போதும் மலையேறத் தடை விதிக்கப்பட்டிருந்தது.
ஆரஞ்சு அலெர்ட்
திருவண்ணாமலைக்கு ஆரஞ்சு அலெர்ட்
இந்நிலையில், தற்போது டித்வா புயல் காரணமாகத் திருவண்ணாமலை மாவட்டத்திற்கு ஆரஞ்ச் அலெர்ட் எச்சரிக்கை விடுக்கப்பட்டுள்ளது. இந்திய புவியியல் ஆய்வு மையத்தின் வல்லுநர் குழு சமீபத்தில் அளித்த அறிக்கையில், மலையேறும் பாதையில் பல இடங்களில் கற்பாறைகள் தளர்ந்த நிலையில் இருப்பதாகவும், மலைப்பாதை உறுதித்தன்மை இன்றி இருப்பதாகவும் எச்சரித்துள்ளது. பாறைகள் சரியும் அபாயம் இருப்பதால், இந்த ஆண்டும் மலையேறுவதற்கு அனுமதி மறுக்கப்பட்டுள்ளது. மாவட்ட நிர்வாகத்தின் இந்தத் தற்காலிக நடவடிக்கைக்குப் பக்தர்கள் முழு ஒத்துழைப்பு அளித்து, மலையேறுவதைத் தவிர்க்குமாறு கேட்டுக் கொள்ளப்படுகிறார்கள். டிசம்பர் 3 ஆம் தேதி அதிகாலை பரணி தீபமும், மாலையில் மகாதீபமும் ஏற்றப்படும் முக்கிய நிகழ்வு, வழக்கம் போல் நடைபெறும்.