'மோக்கா' புயல் இன்று மாலை உருவாகும்: வானிலை எச்சரிக்கை
வங்க கடலில் இன்று(மே 10) மாலை மோக்கா புயல் உருவாகும் என்று வானிலை ஆய்வு மையம்(IMD) தெரிவித்துள்ளது. தென்கிழக்கு வங்கக்கடல் மற்றும் அதை ஒட்டிய தெற்கு அந்தமான் கடல் பகுதியில் கடந்த திங்கள்கிழமை ஒரு காற்றழுத்த தாழ்வு பகுதி உருவானது. அது நேற்று காற்றழுத்த தாழ்வு மண்டலமாக வலுப்பெற்று, தற்போது அந்தமானுக்கு தென்மேற்கே சுமார் 510 கிலோ மீட்டர் தொலைவில் நிலை கொண்டுள்ளது. இந்த காற்றழுத்த தாழ்வு மண்டலம் இன்று மாலை மோக்கா புயலாக வலுப்பெற இருக்கிறது. "இது சிறிது நேரம் வடமேற்கு திசையை நோக்கி நகர்ந்து, பின்னர் வடக்கு-வடமேற்கு திசையை நோக்கி நகர்ந்து, இன்று மாலை அதே பகுதியில் படிப்படியாக ஒரு சூறாவளி புயலாக தீவிரமடையும்" என்று IMD தெரிவித்துள்ளது.
மணிக்கு 100 கிமீ வேகத்தில் காற்று வீசுக்கூடும்
வங்கக் கடலில் உருவாகும் மோக்கா புயல், வெள்ளிக்கிழமைக்குள் மிகக் கடுமையான புயலாக வலுப்பெறும் என்றும், அப்போது காற்று மணிக்கு 130 கிமீ வேகத்தில் வீசக்கூடும் என்றும் இந்திய வானிலை ஆய்வு மையம் தெரிவித்துள்ளது. வங்கக் கடலில் உருவாகி உள்ள காற்றழுத்த தாழ்வு மண்டலம், அடுத்த 12 மணி நேரத்தில் மோக்கா புயலாக மாறும் என்று எச்சரிக்கப்பட்டுள்ளது. புயல் உருவானவுடன் மணிக்கு 80-90 கிமீ வேகத்தில் காற்று வீசும் என்றும், இடையிடையே மணிக்கு 100 கிமீ வேகத்தில் காற்று வீசும் என்றும் எதிர்பார்க்கப்படுகிறது. மோக்கா புயல் முதலில் வடக்கு-வடமேற்கு திசையில் மே 12ஆம் தேதி காலை வரை நகரும். அதன் பின்னர் வங்காளதேசம்-மியான்மர் கடற்கரையை நோக்கி நகரும் என்று வானிலை ஆய்வு மையம் தெரிவித்துள்ளது.
இந்த காலவரிசையைப் பகிரவும்