கொளுத்தும் வெயிலுக்கு நடுவே ஒரு ஜில் நியூஸ்! தமிழகத்தில் ஏப்ரல் 9 வரை இடி மின்னலுடன் மழைக்கு வாய்ப்பு
செய்தி முன்னோட்டம்
தமிழகத்தில் வரும் ஏப்ரல் 9 ஆம் தேதி வரை ஓரிரு இடங்களில் லேசானது முதல் மிதமான மழை பெய்ய வாய்ப்புள்ளதாக சென்னை வானிலை ஆய்வு மையம் தெரிவித்துள்ளது. தற்போது சுமார் 0.9 கி.மீ உயரத்தில் மரத்வாடா முதல் தென்தமிழகம் வரை உள் கர்நாடகா வழியாக ஒரு காற்றழுத்தத் தாழ்வுப் பாதை நிலவுகிறது. இதன் காரணமாக, இன்று (ஏப்ரல் 3) தென் தமிழக கடலோர மாவட்டங்கள் மற்றும் மேற்குத் தொடர்ச்சி மலை மாவட்டங்களில் இடி மின்னலுடன் கூடிய லேசான மழை பெய்யக்கூடும். ஏனைய மாவட்டங்கள், புதுவை மற்றும் காரைக்கால் பகுதிகளில் பெரும்பாலும் வறண்ட வானிலையே நிலவக்கூடும்.
வானிலை அறிக்கை
ஏப்ரல் 5 முதல் 9 வரை: மாவட்ட வாரியான மழை கணிப்பு
நாளை தமிழகம், புதுவை மற்றும் காரைக்கால் பகுதிகளில் ஓரிரு இடங்களில் இடி மின்னலுடன் கூடிய மழைக்கு வாய்ப்புள்ளது. குறிப்பாக ஏப்ரல் 5 மற்றும் 6 ஆம் தேதிகளில் ஒருசில இடங்களில் பரவலாக மிதமான மழை பெய்யக்கூடும். ஏப்ரல் 7 ஆம் தேதி அன்று தமிழகக் கடலோர மாவட்டங்கள், மேற்குத் தொடர்ச்சி மலை மாவட்டங்கள் மற்றும் புதுச்சேரி பகுதிகளில் மழை நீடிக்கும். அதனைத் தொடர்ந்து ஏப்ரல் 8 மற்றும் 9 ஆம் தேதிகளில் தமிழகத்தின் பல்வேறு பகுதிகளில் ஓரிரு இடங்களில் லேசானது முதல் மிதமான மழையை எதிர்பார்க்கலாம் என்று வானிலை ஆய்வு மையம் கணித்துள்ளது.
வெப்பநிலை
அதிகரிக்கும் வெப்பநிலை: வடதமிழகத்திற்கு எச்சரிக்கை
மழை ஒருபுறம் இருந்தாலும், தமிழகத்தின் வெப்பநிலை கணிசமாக உயர வாய்ப்புள்ளது. இன்று முதல் ஏப்ரல் 7 ஆம் தேதி வரை வடதமிழகம், புதுவை மற்றும் காரைக்கால் பகுதிகளில் ஒருசில இடங்களில் அதிகபட்ச வெப்பநிலை இயல்பை விட 2-3° செல்சியஸ் வரை அதிகரிக்கக்கூடும். தென்தமிழகத்தில் வெப்பநிலை இயல்பை ஒட்டியே இருக்கும். கோடை வெயிலின் தாக்கம் அதிகரித்து வருவதால், மதிய நேரங்களில் மக்கள் தேவையின்றி வெளியே செல்வதைத் தவிர்ப்பது நலமாகும்.
சென்னை
சென்னை மற்றும் புறநகர் பகுதிகளின் வானிலை
சென்னை மற்றும் அதன் புறநகர் பகுதிகளைப் பொறுத்தவரை, இன்று மற்றும் நாளை வானம் ஓரளவு மேகமூட்டத்துடன் காணப்படும். நகரின் ஒருசில இடங்களில் லேசான மழைக்கு வாய்ப்பு இருந்தாலும், வெப்பத்தின் தாக்கம் குறையாது. அதிகபட்ச வெப்பநிலை 36-37° செல்சியஸை ஒட்டியும், குறைந்தபட்ச வெப்பநிலை 25-26° செல்சியஸை ஒட்டியும் இருக்கக்கூடும். காற்றில் ஈரப்பதம் அதிகமாக இருப்பதால், லேசான புழுக்கம் உணரப்படலாம் என்று தெரிவிக்கப்பட்டுள்ளது.