பணியில் இருக்கும் ஆசிரியர்களுக்கும் TET தகுதி கட்டாயம்; உச்ச நீதிமன்றம் பரபரப்புத் தீர்ப்பு
செய்தி முன்னோட்டம்
கற்பித்தல் பணியில் தொடர அல்லது பதவி உயர்வு பெற ஆசிரியர் தகுதித் தேர்வில் (TET) தேர்ச்சி பெறுவது கட்டாயம் என்று உச்ச நீதிமன்றம் ஒரு முக்கியமான தீர்ப்பை வழங்கியுள்ளது. நீதிபதிகள் திபாங்கர் தத்தா மற்றும் அகஸ்டின் ஜார்ஜ் மாசிஹ் ஆகியோர் அடங்கிய அமர்வு இந்தத் தீர்ப்பை அளித்துள்ளது. பணி ஓய்வு பெற இன்னும் ஐந்து வருடங்களுக்கு குறைவாக உள்ள ஆசிரியர்களுக்கு இந்தத் தீர்ப்பிலிருந்து விலக்கு அளிக்கப்பட்டுள்ளது. அவர்கள் TET தகுதி இல்லாமல் தங்கள் பணியில் தொடரலாம். அதேசமயம், ஐந்து வருடங்களுக்கு மேல் பணி உள்ளவர்கள், TET தேர்வில் தேர்ச்சி பெறுவது கட்டாயமாகும்.
தேர்ச்சி பெறாதவர்கள்
தேர்ச்சி பெறாதவர்களுக்கு ஓய்வு
அப்படித் தேர்ச்சி பெறாதவர்கள், கட்டாய ஓய்வு அல்லது தாமாகவே பணியிலிருந்து விலகிக்கொள்ளலாம் என்றும் நீதிமன்றம் தெரிவித்துள்ளது. இந்தத் தீர்ப்பானது, தமிழ்நாடு மற்றும் மகாராஷ்டிரா உள்ளிட்ட மாநிலங்களைச் சேர்ந்த பல ஆசிரியர்கள் தாக்கல் செய்த மனுக்களுக்குப் பிறகு வந்துள்ளது. 2010 ஆம் ஆண்டில், தேசிய ஆசிரியர் கல்வி கவுன்சில் (NCTE), பள்ளிகளில் ஒன்று முதல் எட்டாம் வகுப்பு வரையிலான ஆசிரியர்களின் நியமனத்திற்கு குறைந்தபட்ச தகுதியாக TET தேர்வை அறிமுகப்படுத்தியது. இதற்கிடையே, சிறுபான்மை கல்வி நிறுவனங்களுக்கு TET தேர்வை கட்டாயமாக்க முடியுமா மற்றும் அது அவர்களின் உரிமைகளைப் பாதிக்குமா என்ற கேள்வி ஒரு பெரிய அமர்வுக்குப் பரிந்துரைக்கப்பட்டுள்ளது.