சேலம் பெரியார் பல்கலைக்கழக முறைகேடு வழக்கில் 5 பேராசிரியர்களிடம் விசாரணை
சேலம் பெரியார் பல்கலைக்கழக தொழிலாளர் சங்கத்தின் சட்ட ஆலோசகரான இளங்கோவன், பல்கலைக்கழக துணைவேந்தர் ஜெகநாதன் மீது புகாரளித்திருந்தார். அதில் போலி ஆவணங்கள் தயாரித்து தனியார் நிறுவனங்களுடன் புரிந்துணர்வு ஒப்பந்தம் மேற்கொண்டதாகவும், அரசு செலவுகளில் அலுவலர்களை பயன்படுத்தியதாகவும், தனியே நிறுவனங்கள் துவங்கியதாகவும் கூறப்பட்டிருந்தது. மேலும் அவர் சாதிப்பெயரை குறிப்பிட்டு பல்கலைக்கழக சங்கத்தினர் சிலரை திட்டியதாகவும் குற்றம்சாட்டப்பட்டிருந்தது. அதன் அடிப்படையில், காவல்துறை ஜெகநாதனை வன்கொடுமை தடுப்பு சட்டம் உள்ளிட்ட பல பிரிவுகளின் கீழ் வழக்குப்பதிவு செய்து கைது செய்தது. அதனையடுத்து அவர் கடந்த டிச.,27ம் தேதி காலை சேலம் நீதிமன்றத்தில் ஆஜர்படுத்தப்பட்டார். அங்கு அவருக்கு 7 நாட்களுக்கு ஜாமீன் வழங்கப்பட்டதுடன், அந்த ஒருவார காலமும் சூரமங்கலம் காவல் நிலையத்தில் ஆஜராகி கையெழுத்திட வேண்டும் என்றும் உத்தரவிடப்பட்டது.
தனி தனியே இவர்களிடம் உதவி ஆணையாளர் விசாரணை நடத்தினார்
இதனிடையே, இந்த வழக்கு தொடர்பாக கருப்பூர் காவல் நிலையம் சார்பில் சேலம் பெரியார் பல்கலைக்கழக பேராசிரியர்கள் உள்பட 5 பேருக்கு சம்மன் அனுப்பப்பட்டது. அதன்படி பேராசிரியர் சுப்ரமணிய பாரதி, நரேஷ் குமார், ஜெயக்குமார், ஜெயராமன் மற்றும் ஊழியரான தந்தீஸ்வரன் உள்ளிட்டோர் விசாரணைக்காக இன்று(ஜன.,4) காலை நேரில் ஆஜராகியுள்ளனர். சூரமங்கலம் உதவி ஆணையாளர் தலைமையில் இவர்களிடம் விசாரணை மேற்கொள்ளப்பட்டது. மேலும், தனியார் நிறுவனங்கள் துவங்கப்பட்டது குறித்த ஆவணங்கள் இவர்களிடம் உள்ளதா? என்பது குறித்து தனி தனியே இவர்களிடம் உதவி ஆணையாளர் விசாரணை நடத்தினார் என்று செய்திகள் தெரிவிக்கிறது.
