காலமான முன்னாள் பஞ்சாப் முதல்வரின் உடலுக்கு மரியாதை செலுத்தினார் பிரதமர் மோடி
நேற்று காலமான மூத்த அரசியல்வாதியும், அகாலிதளத்தின் தலைவருமான பிரகாஷ் சிங் பாதலுக்கு அஞ்சலி செலுத்த பிரதமர் நரேந்திர மோடி இன்று(ஏப்-26) சண்டிகர் சென்றடைந்தார். ஷிரோமணி அகாலிதளம்(SAD) தலைவர் பிரகாஷ் சிங் பாதல், நாள்பட்ட சுவாசக் கோளாறு காரணமாக நேற்று மாலை மொஹாலியில் உள்ள தனியார் மருத்துவமனையில் காலமானார். இவர் ஐந்து முறை பஞ்சாப் முதலமைச்சராக பணியாற்றி இருக்கிறார். சண்டிகரில் உள்ள SAD தலைமையகத்தில் வைக்கப்பட்டுள்ள பாதலின் உடலுக்கு பிரதமர் நரேந்திர மோடி உட்பட பல அரசியல் தலைவர்கள் இறுதி மரியாதை செலுத்தினர். அவரது இறுதிச் சடங்குகள் முக்த்சார் மாவட்டத்தில் உள்ள அவரது பூர்வீக கிராமமான பாதலில் நாளை நடைபெறவுள்ளது. பாதல் 1970இல் முதன்முதலில் முதலமைச்சராக பொறுப்பேற்ற போது அவரது வயது 43 ஆகும்.
இந்தியா முழுவதும் 2 நாட்கள் துக்கம் அனுசரிக்கப்படுகிறது
2012 இல் தனது 83வது வயதில் அவர் ஐந்தாவது முறையாக பதவியேற்றார். பாதல் கிட்டத்தட்ட 70 ஆண்டுகள் அரசியல் தலைவராக இருந்திருக்கிறார். விவசாயிகளுக்கு இலவச மின்சாரம், சமூக பாதுகாப்பு ஓய்வூதியம், வறுமைக் கோட்டிற்கு கீழ் உள்ள குடும்பங்களுக்கு இலவச கோதுமை மற்றும் பருப்பு வழங்கும் திட்டம் போன்ற பல நல்ல திட்டங்களை உருவாக்கிய செல்வாக்கு மிக்க தலைவர் இவர் ஆவார். "பிரகாஷ் சிங் பாதலின் மறைவு எனக்கு தனிப்பட்ட இழப்பாகும். நான் பல தசாப்தங்களாக அவருடன் நெருக்கமாகப் பழகி, அவரிடமிருந்து நிறைய கற்றுக்கொண்டேன்." என்று நேற்று பிரதமர் மோடி தெரிவித்திருந்தார். இந்த மூத்த அரசியல்வாதிக்கு மரியாதை செலுத்தும் வகையில் இந்தியா முழுவதும் 2 நாட்கள் துக்கம் அனுசரிக்கப்படும் என மத்திய அரசு அறிவித்துள்ளது.
இந்த காலவரிசையைப் பகிரவும்