சென்னை விமான நிலையத்தில் பயணிகள் எண்ணிக்கை பெருமளவில் அதிகரிப்பு
சென்னை விமான நிலையத்தில் கொரோனா பாதிப்பிற்கு பிறகு பயணிகள் மற்றும் விமானங்களின் எண்ணிக்கை பெருமளவில் அதிகரித்துள்ளது என்று தகவல்கள் தெரிவிக்கிறது. கடந்த ஜனவரி மாதம் சென்னை உள்நாடு மற்றும் பன்னாட்டு முனையங்களில் 12,380 விமானங்கள் இயக்கப்பட்டன. இதில் கடந்த மாதம் முழுவதும் பயணித்த பயணிகளின் எண்ணிக்கை 17,61,426 என கூறப்படுகிறது. அதுவே கடந்த டிசம்பர் மாதம் 12,103 விமானங்கள் இயக்கப்பட்ட நிலையில், 17,22,496 பயணிகள் பயணம் செய்துள்ளார்கள். இதன்படி, ஜனவரி மாதத்தில் நாளொன்றுக்கு வரலாற்றில் முதன்முறையாக 56,822 பயணிகள் பயணம் செய்துள்ளார்கள். இதுவே டிசம்பர் மாதத்தில் நாளொன்றுக்கு 392 விமானங்களில் 55,565 பயணிகள் பயணம் செய்துள்ளார்கள்.
டிசம்பர் மாதம் 23ம் தேதி ஒரே நாளில் 62 ஆயிரத்து 486 பயணிகள் பயணம்
அதன்படி ஒப்பிட்டு பார்க்கையில் டிசம்பர் மாதத்தை விட ஜனவரி மாதத்தில் விமானங்களின் எண்ணிக்கையும் , பயணிகளின் எண்ணிக்கையும் அதிகரித்துள்ளது. இதனையடுத்து வரலாற்றில் முதன்முறையாக சென்னை மீனம்பாக்கம் விமான நிலையத்தில் அதிகளவு விமானங்களில் அதிகளவு பயணிகள் பயணம் மேற்கொண்டுள்ளார்கள் என்பது குறிப்பிடவேண்டியவை. மேலும் டிசம்பர் மாதம் 23ம் தேதி ஒரே நாளில் சென்னை விமான நிலையத்தில் 62 ஆயிரத்து 486 பயணிகள் பயணித்தனர் என தகவல்கள் தெரிவிக்கிறது. சென்னை விமான நிலைய வரலாற்றில், ஒரே நாளில் அதிகபட்ச பயணிகள் பயணம் செய்தது பெரும் சாதனையாக உள்ளது என்பது குறிப்பிடத்தக்கது.
