நாடாளுமன்ற பட்ஜெட் கூட்டத்தொடர் இன்று தொடங்குகிறது
நாடாளுமன்றத்தின் மழைக்காலக் கூட்டத்தொடர் இன்று தொடங்க உள்ளது, மக்களவை மற்றும் மாநிலங்களவை இரண்டிலும் இன்று முதல் ஆகஸ்ட் 12 வரை 19 அமர்வுகள் நடப்படும் என திட்டமிடப்பட்டுள்ளது. இந்த கூட்டத்தொடரின் முக்கிய அம்சமான மத்திய பட்ஜெட் நாளை(ஜூலை 23) தாக்கல் செய்யப்படும். பிப்ரவரி 1, 2024 அன்று வழங்கப்பட்ட இடைக்கால பட்ஜெட்டைத் தொடர்ந்து இந்த பட்ஜெட் தாக்கல் செய்யப்பட உள்ளது. நிதியமைச்சர் நிர்மலா சீதாராமன் இன்று நாடாளுமன்றத்தில் பொருளாதார ஆய்வறிக்கையை தாக்கல் செய்ய உள்ளார். இந்த அமர்வின் போது, 90 ஆண்டுகள் பழமையான விமானச் சட்டத்தை மாற்றுவது உட்பட 6 மசோதாக்களை மத்திய அரசு முன்வைக்கும் என்று எதிர்பார்க்கப்படுகிறது.
மத்திய அரசுக்கு முட்டுக்கட்டை போட இருக்கும் எதிர்க்கட்சிகள்
மேலும் தற்போது மத்திய ஆட்சியின் கீழ் உள்ள ஜம்மு-காஷ்மீர் பட்ஜெட்டுக்கு நாடாளுமன்றத்தின் ஒப்புதல் பெறப்படும் என்றும் எதிர்பார்க்கப்படுகிறது. நீட் தேர்வுத்தாள் கசிவு வழக்கு, உணவகங்களுக்கு உத்தரபிரதேசம் மற்றும் உத்தரகாண்ட் மாநில அரசுகளின் உத்தரவுகள், யூனியன் பப்ளிக் சர்வீஸ் கமிஷன் நடத்திய தேர்வுகளில் முறைகேடுகள், மத்திய விசாரணை அமைப்புகள், மக்களவை துணை சபாநாயகர் நியமனம் உள்ளிட்ட பல்வேறு பிரச்னைகளில் மத்திய அரசுக்கு எதிர்க்கட்சிகள் முட்டுக்கட்டை போட உள்ளது. நாடாளுமன்றக் கூட்டத் தொடருக்கு முன்னதாக இன்று நடைபெற்ற அனைத்துக் கட்சிக் கூட்டத்தின் போது, அனைத்து விவகாரங்கள் குறித்தும் விவாதிக்க அரசு விருப்பம் தெரிவித்தது. ஆனால் அது விதிகளின்படி இருக்க வேண்டும் என்று நாடாளுமன்ற விவகாரத்துறை அமைச்சர் கிரண் ரிஜிஜு வலியுறுத்தினார்.