'ஒரே நாடு ஒரே தேர்தல்': மோடி 3.0 வில் அமல்படுத்தப்படும் எனத்தகவல்
"ஒரே நாடு, ஒரே தேர்தல்" என குறிப்பிடப்படும் மக்களவை மற்றும் சட்டமன்றங்களுக்கான தேர்தலை ஒரே நேரத்தில் நடத்துவது என்ற கருத்து, தற்போதைய நரேந்திர மோடி அரசாங்கத்தின் ஆட்சிக் காலத்திற்குள் செயல்படுத்தப்படும் என்று வட்டாரங்கள் தெரிவித்தன. தி ஹிந்து வெளியிட்ட செய்தியின்படி, 2011 ஆம் ஆண்டு முதல் மேற்கொள்ளப்படாத மக்கள் தொகை கணக்கெடுப்பு பணியும் விரைவில் தொடங்கும் என்று அரசு வட்டாரங்கள் தெரிவித்ததாக செய்தி வெளியிட்டுள்ளது. தற்போதைய மோடி அரசு பதவியேற்று 100 நாட்கள் நிறைவடையும் இந்த தருணத்தில் இந்த தேர்தல் முறையை நடைமுறைப்படுத்துவது தொடர்பாக மத்திய அரசு தீவிர ஆலோசனையில் இறங்கியுள்ளது.
மோடியின் உறுதி
2014ல் ஆட்சிக்கு வந்த சில மாதங்களிலேயே பிரதமர் நரேந்திர மோடியால் ஒரே நேரத்தில் தேர்தல் நடத்தப்படும் என்ற கருத்து முன்னிலைப்படுத்தப்பட்டது. இதற்காக முன்னாள் குடியரசுத் தலைவர் ராம்நாத் கோவிந்த் தலைமையிலான குழுவும் அமைக்கப்பட்டு ஒரே நாடு, ஒரே தேர்தலுக்கான சாத்தியக்கூறுகளையும், சாதக பாதகங்களையும் ஆய்வு செய்தது. நாடாளுமன்றம் மற்றும் சட்டசபைகளுக்கு ஒரே நேரத்தில் தேர்தல் நடத்தவும், அதைத் தொடர்ந்து 100 நாட்களுக்குள் உள்ளாட்சி தேர்தல் நடத்தவும் பரிந்துரைத்தது. இந்த நிலையில் பிரதமர் மோடி தனது சுதந்திர தின உரையில் இந்த திட்டத்தின் மீது தனது அரசாங்கத்தின் உறுதிப்பாட்டை மீண்டும் வலியுறுத்தினார். மேலும் இந்த முடிவுக்கு பங்களிக்க அனைத்து அரசியல் கட்சிகளுக்கும் வேண்டுகோள் விடுத்தார்.
சட்ட ஆணையத்தின் பரிந்துரை
தனித்தனியாக, லோக்சபா, மாநில சட்டசபைகள் மற்றும் நகராட்சிகள் மற்றும் பஞ்சாயத்துகள் போன்ற உள்ளாட்சி அமைப்புகளுக்கு - 2029 முதல், மூன்று அடுக்கு அரசாங்கங்களுக்கும் ஒரே நேரத்தில் தேர்தலை நடத்தவும், தொங்கு பாராளுமன்றம் அல்லது நம்பிக்கையில்லா வழக்குகளில் ஒற்றுமை அரசாங்கத்திற்கான ஏற்பாடு செய்யவும் சட்ட ஆணையம் பரிந்துரைக்க வாய்ப்புள்ளது. எனினும் கோவிந்த் குழு ஒரே நேரத்தில் தேர்தல் நடத்துவதற்கான எந்த காலத்தையும் குறிப்பிடவில்லை. குழுவின் பரிந்துரைகளை நிறைவேற்றுவது குறித்து ஆராய்வதற்காக 'செயல்படுத்தும் குழு' ஒன்றை உருவாக்க முன்மொழிந்துள்ளது. குழு 18 அரசியலமைப்பு திருத்தங்களை பரிந்துரைத்தது, அவற்றில் பெரும்பாலானவை மாநில சட்டசபைகளின் ஒப்புதல் தேவைபடாதது. இருப்பினும், இதற்கு சில அரசியலமைப்பு திருத்த மசோதாக்கள் தேவைப்படும், அவை பாராளுமன்றத்தால் நிறைவேற்றப்பட வேண்டும்.
