ஜூலை 31 முதல் சிக்கன் கிடைக்காது! 60,000 கடைகள் அடைப்பு! எடை மோசடிக்கு எதிராக கோழி வணிகர்கள் வேலைநிறுத்தம்
செய்தி முன்னோட்டம்
தமிழ்நாடு மற்றும் புதுச்சேரியில் வரும் ஜூலை 31 ஆம் தேதி முதல் கறிக்கோழி (பிராய்லர் கோழி) விற்பனை செய்யப்பட மாட்டாது என்றும், கோழி வணிகர்கள் காலவரையற்ற வேலைநிறுத்தப் போராட்டத்தில் ஈடுபட உள்ளதாகவும் தமிழ்நாடு கோழி வணிகர்கள் கூட்டமைப்பு அதிரடியாக அறிவித்துள்ளது. கறிக்கோழி உற்பத்தியாளர்கள் மீது அடுக்கடுக்கான குற்றச்சாட்டுகளை முன்வைத்து இந்த கடையடைப்புப் போராட்டத்தை வணிகர்கள் முன்னெடுத்துள்ளனர். இதன் காரணமாகத் தமிழ்நாடு முழுவதும் சுமார் 60,000 கடைகளில் கறிக்கோழி விற்பனை நிறுத்தப்பட்டு, பொதுமக்களுக்குக் கோழி இறைச்சி கிடைப்பதில் பெரும் பாதிப்பு ஏற்படும் சூழல் உருவாகியுள்ளது.
குற்றச்சாட்டு
தீவனக் கட்டுப்பாடு மீறல் மற்றும் எடை மோசடி குற்றச்சாட்டு
கறிக்கோழிகளை விற்பனைக்கு அனுப்புவதற்கு 12 முதல் 15 மணி நேரத்திற்கு முன்பாக, உற்பத்தி நிறுவனங்கள் தீவனக் கட்டுப்பாடு முறையைக் கடைப்பிடிப்பதில்லை என்று வணிகர்கள் குற்றம் சாட்டுகின்றனர்.
கோழிகளை விற்பனைக்கு அனுப்பும் மிக நெருக்கமான நேரத்தில், கழுத்து வரை அளவுக்கு அதிகமாகத் தீவனத்தைக் கொடுத்து அனுப்புகின்றனர்.
இதனால் கோழிகளின் எடை செயற்கையாக அதிகமாகக் காட்டப்பட்டு, வணிகர்களுக்குக் கடுமையான பொருளாதார இழப்பு ஏற்படுகிறது.
மேலும், ஜீரணமாகாத தீவனத்தால் கோழிக் கழிவுகள் இறைச்சியில் கலந்து சுகாதாரக் கேடு மற்றும் சுற்றுச்சூழல் மாசுபாட்டையும் ஏற்படுத்துகிறது.
வழிகாட்டு நெறிமுறைகள்
அரசிடம் வழிகாட்டு நெறிமுறைகள் கோரிக்கை
விற்பனைக்கு வரும் கறிக்கோழிகளுக்கு 15 மணி நேரத்திற்கு முன்பே தீவனம் வழங்குவதை நிறுத்த வேண்டும் என்ற நடைமுறையைக் கோழி உற்பத்தியாளர்கள் கட்டாயம் பின்பற்ற வேண்டும் என வணிகர்கள் வலியுறுத்துகின்றனர்.
இந்தத் தீவனக் கட்டுப்பாட்டு நடைமுறையைக் கட்டாய வழிகாட்டு நெறிமுறையாகத் தமிழ்நாடு அரசு அறிவிக்க வேண்டும் என்றும், இதனைச் சட்டமாகக் கொண்டுவர வேண்டும் என்றும் வணிகர்கள் கேட்டுக்கொண்டுள்ளனர்.
மேலும், இந்த வழிகாட்டு நெறிமுறைகளை அனைத்து மண்டல மற்றும் மாவட்ட கால்நடைத்துறை அதிகாரிகளுக்கும் அரசு உடனடியாக அறிவுறுத்த வேண்டும் என வலியுறுத்தியுள்ளனர்.
கடை அடைப்பு
புதுச்சேரி வணிகர்களின் ஆதரவும் கடைகள் அடைப்பும்
கறிக்கோழி எடை மோசடிகளைத் தடுத்து நிறுத்தக் கோரித் தமிழ்நாட்டில் நடத்தப்படும் இந்த வேலைநிறுத்தப் போராட்டத்திற்கு புதுச்சேரி மாநிலத்தை சேர்ந்த கோழி வணிகர்களும் முழு ஆதரவு தெரிவித்துள்ளனர்.
புதுச்சேரியில் உள்ள அனைத்து மொத்த மற்றும் சில்லறை கறிக்கோழி விற்பனையாளர்களும் தமிழ்நாட்டு வணிகர்களுடன் இணைந்து இந்த காலவரையற்ற கடையடைப்புப் போராட்டத்தில் பங்கேற்க உள்ளனர்.
இதனால் இரு மாநிலங்களிலும் ஜூலை 31 முதல் பிராய்லர் கோழி விற்பனை முற்றிலும் ஸ்தம்பிக்கும் அபாயம் ஏற்பட்டுள்ளதால், அரசு உடனடியாக தலையிட்டு பேச்சுவார்த்தை நடத்த வேண்டும் என எதிர்பார்க்கப்படுகிறது.