தமிழ்நாட்டிற்கு 3வது இடம்! 2026க்கான நிதி ஆயோக்கின் முதலீட்டாளர்களுக்கு உகந்த மாநிலங்கள் பட்டியல் வெளியீடு

எழுதியவர் Sekar Chinnappan

Jul 19, 2026

06:55 am

செய்தி முன்னோட்டம்

இந்தியாவில் முதலீடுகளை ஈர்ப்பதில் மிகச் சிறந்த சூழலைக் கொண்டுள்ள மாநிலங்களைக் கண்டறிய, நிதி ஆயோக் அமைப்பு முதன்முறையாக 2026 ஆம் ஆண்டிற்கான முதலீட்டாளர்களுக்கு உகந்த மாநிலங்கள் குறியீட்டை (Investment Friendliness Index 2026) வெளியிட்டுள்ளது. மொத்தம் 17 முக்கிய பெரிய மாநிலங்களில் நடத்தப்பட்ட இந்த விரிவான ஆய்வில், குஜராத் மாநிலம் 56.6 புள்ளிகளைப் பெற்று நாட்டின் முதன்மையான முதலீட்டுத் தலமாகத் முதலிடத்தைப் பிடித்துள்ளது. இந்தத் தரவரிசைப் பட்டியலில் மகாராஷ்டிரா மாநிலம் 53.7 புள்ளிகளுடன் இரண்டாவது இடத்தையும், தமிழ்நாடு 53.3 புள்ளிகளுடன் மூன்றாவது இடத்தையும் பெற்றுள்ளன.

குஜராத்

குஜராத்தின் ஒற்றைச் சாளர முறை மற்றும் தொழிலாளர் சூழல்

குஜராத் மாநிலத்தின் தொழில்துறை விரிவாக்கப் பணியகம் (iNDEXTb) வழங்கும் ஒற்றைச் சாளர அனுமதி முறை (Single-Window System), அங்கு புதிய தொழில்களைத் தொடங்குவதை மிக எளிமையாகவும் வெளிப்படையானதாகவும் மாற்றியுள்ளது.

மேலும், குறிப்பிட்ட கால வரம்பிற்குள் சட்டப்பூர்வ அனுமதிகள் மற்றும் தடையின்மைச் சான்றிதழ்கள் (NOC) வழங்கப்படுவதால் திட்டங்கள் தொய்வின்றி செயல்படுத்தப்படுகின்றன.

அத்தியாவசிய சேவைகளில் வேலைநிறுத்தங்களுக்கு விதிக்கப்பட்டுள்ள கட்டுப்பாடுகள், தொழிற்சாலைகளில் தேவையற்ற விவாதங்களைத் தவிர்த்து, வணிகங்களுக்கு ஒரு நிலையான மற்றும் கணிக்கக்கூடிய செயல்பாட்டுச் சூழலை வழங்கியுள்ளதாக இந்த நிதி ஆயோக் அறிக்கை சுட்டிக்காட்டுகிறது.

உள்கட்டமைப்பு

உலகத் தரம் வாய்ந்த உள்கட்டமைப்பு மற்றும் அதிவேக சாலைகள்

தோலேரா சிறப்பு முதலீட்டு மண்டலம், கிப்ட் சிட்டி, சானந்த் போன்ற தொழிற்துறை மையங்களில் உள்ள உலகத் தரம் வாய்ந்த பிளக்-அண்ட்-பிளே (Plug-and-play) வசதிகள், புதிய தொழிற்சாலைகளை மிக விரைவாக அமைக்க உதவுகின்றன.

வைப்ரண்ட் குஜராத் மாநாடுகள் உலகளாவிய முதலீடுகளை ஈர்க்கும் முக்கிய காரணியாக உள்ளன. குஜராத் மாநிலம் இந்தியாவின் ஒட்டுமொத்த மாநில நெடுஞ்சாலை வலையமைப்பில் 10 சதவீதத்தைக் கொண்டுள்ளது.

இது தேசிய சராசரியை விட நான்கு மடங்கு அதிகமாகும்.

நாட்டின் மிக நீண்ட 635 கிலோமீட்டர் அதிவேக விரைவுச் சாலைகளும் (Expressways) இந்த மாநிலத்திலேயே அமைந்துள்ளன.

மின்சாரம்

29 சதவீதம் குறைவான மின் கட்டணம் மற்றும் தடையற்ற மின்சாரம்

தொழில்துறை வளர்ச்சிக்கு குஜராத்தின் மின்சாரத் துறை மிகப்பெரிய பலமாக உள்ளது என்று இந்த குறியீடு அங்கீகரிக்கிறது.

குஜராத்தில் உள்ள தொழில்முறை நுகர்வோர்கள் தேசிய சராசரியை விட கிட்டத்தட்ட 29 சதவீதம் குறைவான மின் கட்டண பலன்களைப் பெறுகிறார்கள்.

மேலும், பெரிய மாநிலங்களின் சராசரியை விட அதிகமாக, இம்மாநிலத்தில் தினமும் சராசரியாக 23.8 மணிநேரம் தடையற்ற மின்சாரம் வழங்கப்படுகிறது.

இந்த மலிவான மின் கட்டணமும், நம்பகமான மின்சார விநியோகமும் தொழிற்சாலைகளின் இயக்கச் செலவைக் குறைத்து, அவற்றின் உற்பத்தித் திறனையும் வணிக செயல்திறனையும் கணிசமாக உயர்த்தியுள்ளதாக அறிக்கை கூறுகிறது.

ஏற்றுமதி

ஏற்றுமதிப் பங்களிப்பு மற்றும் நிதி ஒழுக்கம்

இந்தியாவின் ஒட்டுமொத்தப் பொருட்கள் ஏற்றுமதியில் குஜராத் மாநிலம் மட்டும் தனியாக 31 சதவீதப் பங்களிப்பைக் கொண்டு சாதனை படைத்துள்ளது.

இம்மாநிலத்தின் தனிநபர் வருமானம் ரூ.2,64,232 ஆக உள்ளது, இது பிற பெரிய மாநிலங்களின் சராசரியை விட 67 சதவீதம் அதிகமாகும்.

நிதி நிர்வாகத்தைப் பொறுத்தவரை, 2024 நிதியாண்டில் குஜராத்தின் நிதிப் பற்றாக்குறை மாநில உள்நாட்டு உற்பத்தியில் வெறும் 2.81 சதவீதமாக மட்டுமே இருந்தது.

இது அனைத்து மாநிலங்களிலும் மிகக் குறைவான அளவாகும். இது மாநிலத்தின் சிறந்த நிதி ஒழுக்கத்தைக் காட்டுகிறது.

ஆய்வகம்

அடல் டிங்கரிங் ஆய்வகங்கள் மூலம் புதுமைப் பொருளாதாரம்

எதிர்காலத் தொழில்துறை வளர்ச்சிக்குத் தேவையான புதுமைப் பொருளாதாரத்தை (Innovation Ecosystem) வளர்ப்பதிலும் குஜராத் முன்னணியில் உள்ளது.

2025 நிதியாண்டு நிலவரப்படி, இம்மாநிலத்தில் 614 அடல் டிங்கரிங் ஆய்வகங்கள் (Atal Tinkering Labs) நிறுவப்பட்டுள்ளன.

ஒரு லட்சம் மக்கள் தொகைக்கு 1.24 ஆய்வகங்கள் என்ற விகிதத்தில், குஜராத் மாநிலம் பிற பெரிய மாநிலங்களின் சராசரியை விட 19 சதவீதம் உயர்வாக செயல்படுகிறது.

இது புதிய கண்டுபிடிப்புகள், தொழில்முனைவோர் மற்றும் வளர்ந்து வரும் தொழில்நுட்பங்களுக்கான வலுவான அடித்தளத்தை மாணவர்களிடையே உருவாக்கி, மாநிலத்தின் தொழில்துறை எதிர்காலத்தை உறுதிப்படுத்துகிறது.