கேரளாவிற்கு நிபா வைரஸ் எச்சரிக்கை: 2 பேர் 'இயற்கைக்கு மாறான' முறையில் பலி
செய்தி முன்னோட்டம்
கேரளா: கோழிக்கோடு மாவட்டத்தில் "இயற்கைக்கு மாறான" முறையில் உயிரிழந்த இருவர் நிபா வைரஸ்(NiV) நோயால் பாதிக்கப்பட்டிருக்கலாம் என்று சந்தேகிக்கப்படுகிறது. இதனையடுத்து, நேற்று இரவு கேரள சுகாதாரத் துறை கேரளாவுக்கு சுகாதார எச்சரிக்கை விடுத்தது.
"இயற்கைக்கு மாறான" முறையில் உயிரிழந்தவர்களுள் ஒருவரின் உறவினர்களும் தீவிர சிகிச்சை பிரிவில்(ICU) அனுமதிக்கப்பட்டுள்ளனர்.
உயிரிழந்த இருவருமே கோழிக்கோடு மாவட்டத்தில் உள்ள ஒரு தனியார் மருத்துவமனையில் அனுமதிக்கப்பட்டிருந்ததாக தகவல்கள் தெரிவிக்கின்றன.
இதற்கிடையில், நேற்று, அம்மாநில சுகாதாரத்துறை அமைச்சர் ஒரு உயர்மட்டக் கூட்டத்தை நடத்தி கோழிக்கோடு மாவட்டத்தின் நிலைமையை ஆய்வு செய்தார்.
தென்னிந்தியாவில் முதல்முறையாக 2018இல் நிபா வைரஸ் தொற்றுநோய் கோழிக்கோடு மற்றும் மலப்புரம் மாவட்டங்களில் பதிவாகியது. அதன் பின்னர், 2021இல் மீண்டும் அதே மாவட்டங்களில் நிபா பெருந்தொற்று பதிவாகியது.
ட்னஸ்வ்ஜ்க
நிபா வைரஸ் தொற்று குறித்து தெரிந்து கொள்ள வேண்டியவை
நிபா வைரஸ் தொற்று என்பது விலங்குகள் வழியாக மனிதர்களுக்கு பரவும் ஒரு ஜூனோடிக் நோயாகும்.
இந்த நோய் பழ வெளவால்களால் ஏற்படுகிறது.
மேலும் இது அசுத்தமான உணவுகள் மூலமாகவோ அல்லது பாதிக்கப்பட்ட மனிதர்கள் மூலமாகவோ பரவுகிறது .
இந்த வைரஸ் பன்றிகள் போன்ற விலங்குகளுக்கும் கடுமையான நோயை ஏற்படுத்தக்கூடும்.
சுவாச நோய், அபாயகரமான மூளையழற்சி, இருமல், தொண்டை வலி, தலைச்சுற்றல், தூக்கம், தசை வலி, சோர்வு, தலைவலி, மன குழப்பம் மற்றும் வலிப்புத்தாக்கங்கள் போன்றவை இந்த நோயின் அறிகுறிகளாகும்.
இந்த வைரஸுக்கு உறுதியான சிகிச்சை எதுவும் இல்லை என்றாலும், தரையில் விழுந்த பழங்களை சாப்பிடுவதைத் தவிர்ப்பது, பன்றிகளுக்கு உணவளிப்பதைத் தவிர்ப்பது மற்றும் பழ வெளவால்களை விலக்கி வைப்பது போன்ற முன்னெச்சரிக்கை நடவடிக்கைகளை எடுக்கலாம்.