NEET தேர்வை ஆன்லைனில் நடத்தலாம் என தேர்வு சீரமைப்புக்குழு பரிந்துரை; வேறு என்ன பரிந்துரைகள்?
நீட் நுழைவுத் தேர்வை ஆன்லைனில் நடத்தலாம் என மத்திய அரசுக்கு நீட் தேர்வு சீரமைப்புக்குழு பரிந்துரை செய்துள்ளது. முன்னதாக சில மாதங்களுக்கு முன்னர் இளநிலை மருத்துவப்படிப்புகளில் சேருவதற்காக நடைபெறும் இந்த தேர்வில், ஆள் மாறாட்டம், வினாத்தாள் கசிவு மற்றும் பயிற்சி மையங்களில் கேள்வித்தாள் முன்கூட்டியே வெளியானது போன்ற சர்ச்சைகள் எழுந்தன. இதனால் மாணவர்கள் மற்றும் பெற்றோர்கள் பெரும் அதிர்ச்சியடைந்தனர். இந்த நிலையில், தேர்வில் நடந்த மோசடிகளை தடுக்கும் வகையில், மத்திய அரசு சார்பாக இஸ்ரோ முன்னாள் தலைவர் கே. ராதாகிருஷ்ணன் தலைமையிலான குழு அமைக்கப்பட்டது. இந்த குழு நீட் தேர்வின் சீர்திருத்தங்கள் குறித்த பரிந்துரைகளை மத்திய கல்வி அமைச்சகத்திடம் சமர்ப்பித்துள்ளது.
ஆன்லைன் தேர்வுமுறை இந்த பரிந்துரைகளில் மிக முக்கியமான ஒன்று
பலகட்ட திட்டமிடுதல் மற்றும் ஆய்வுக்கு பின்னர் சீரமைப்பு குழு சில பரிந்துரைகளை செய்துள்ளது. அவை பின்வருமாறு: நீட் நுழைவுத்தேர்வை ஆன்லைனில் நடத்தலாம். தேர்வு மையங்களை அவுட்சோர்சிங் முறையில் வழங்காமல், சொந்த தேர்வு மையங்கள் எண்ணிக்கையை அதிகரிக்க வேண்டும். அரசு பள்ளி, கல்லூரிகளில் தேர்வுகளை நடத்துவது. ஆன்லைன் முறையில் சாத்தியம் இல்லை என்றால், வினாத்தாள்களை டிஜிட்டல் முறையில் தேர்வர்களுக்கு அனுப்பி, அவர்கள் பதில்களை ஓ.எம்.ஆர். விடைத்தாளில் குறிப்பிடலாம். எத்தனை முறை தேர்வில் பங்கேற்பது என்ற தேர்வில் பங்கேற்பதற்கான கட்டுப்பாடுகளை கொண்டு வரலாம். அதிகம் பேர் நீட் தேர்வை எழுதுவதால் பல நிலைகளில் தேர்வுகளை நடத்தலாம்.
