சென்னை டூ பெங்களூர் வெறும் 73 நிமிடம்! 7 புதிய புல்லட் ரயில் திட்டங்களுக்கு மத்திய அரசு ஒப்புதல்
செய்தி முன்னோட்டம்
இந்தியாவின் அதிவேக ரயில் உள்கட்டமைப்பை உலகத் தரத்திற்கு உயர்த்தும் நோக்கில், தற்போது கட்டுமானப் பணியில் இருக்கும் இந்தியாவின் முதல் மும்பை - அகமதாபாத் புல்லட் ரயில் திட்டத்தைத் தாண்டி, நாடு முழுவதும் மேலும் 7 புதிய அதிவேக புல்லட் ரயில் வழித்தடங்களுக்கு மத்திய அரசு அதிகாரப்பூர்வமாக ஒப்புதல் அளித்துள்ளது. இந்த புதிய வழித்தடங்கள் இந்தியாவின் முக்கியப் பொருளாதார, தொழில் மற்றும் தொழில்நுட்ப மையங்களை அதிவேகமாக இணைக்கும் வகையில் திட்டமிடப்பட்டுள்ளன.
பட்ஜெட்
மத்திய பட்ஜெட்டில் வெளியான மெகா அறிவிப்பு
மத்திய நிதியமைச்சர் நிர்மலா சீதாராமன் தாக்கல் செய்த பட்ஜெட்டில், நாட்டின் சுற்றுச்சூழல் சமநிலை மற்றும் அதிவேகப் பயணத்தை உறுதி செய்ய இந்த 7 புதிய காரிடார்கள் உருவாக்கப்படும் என்று அறிவித்திருந்தார். இதனைத் தொடர்ந்து மத்திய ரயில்வே அமைச்சர் அஸ்வினி வைஷ்ணவ், இந்தத் திட்டங்களுக்கான பூர்வாங்கப் பணிகள் மற்றும் சாத்தியக்கூறுகள் குறித்த ஆய்வுகள் தீவிரமாகத் தொடங்கியுள்ளதை அண்மையில் உறுதிப்படுத்தியுள்ளார். நிலம் கையகப்படுத்துதல், நிதி ஒதுக்கீடு மற்றும் தொழில்நுட்ப ஆய்வுகள் முடிந்தவுடன் இதற்கான கட்டுமானப் பணிகள் படிப்படியாகத் தொடங்கும்.
தென்னிந்தியா
தென்னிந்திய நகரங்களை இணைக்கும் புதிய அதிவேகப் பாதைகள்
இந்த புதிய 7 திட்டங்களில் தென்னிந்திய மாநிலங்கள் பெரும் பயன் பெறும் வகையில் வழித்தடங்கள் அமைக்கப்பட்டுள்ளன. குறிப்பாக, சென்னை - பெங்களூரு இடையேயான புல்லட் ரயில் பாதை மூலம் தற்போதைய பயண நேரம் வெறும் 73 நிமிடங்களாகக் குறையும் என அறிவிக்கப்பட்டுள்ளது. இது தவிர, பெங்களூரு - ஹைதராபாத் (பயண நேரம்: 2 மணிநேரம் 10 நிமிடம்), ஹைதராபாத் - சென்னை மற்றும் புனே - ஹைதராபாத் (பயண நேரம்: 2 மணிநேரம் 8 நிமிடம்) ஆகிய மிக முக்கியமான தொழில்நுட்ப நகரங்களை இணைக்கும் வழித்தடங்களும் இந்த புதிய ஒப்புதலில் இடம்பெற்றுள்ளன.
வட இந்தியா
வடஇந்தியாவை இணைக்கும் மற்ற முக்கிய வழித்தடங்கள்
தென்னிந்திய வழித்தடங்கள் மட்டுமின்றி, வடஇந்தியாவின் முக்கிய நகரங்களை இணைக்கும் உள்கட்டமைப்பு பணிகளும் இதில் சேர்க்கப்பட்டுள்ளன. டெல்லி - வாரணாசி இடையேயான புல்லட் ரயில் காரிடார் மூலம் பயண நேரம் 3 மணிநேரம் 15 நிமிடங்களாகக் குறையும். மேலும் டெல்லி - லக்னோ வழித்தடத்தில் 2 மணிநேரத்திலும், வாரணாசி - சிலிகுரி வழித்தடத்திலும் புதிய புல்லட் ரயில்கள் இயக்கப்பட உள்ளன. இந்தியாவின் மிக நீளமான பாதைகளில் ஒன்றான டெல்லி - சிலிகுரி இடையேயான ஒட்டுமொத்த பயண நேரம் இதன் மூலம் வெறும் 6 மணிநேரமாகக் குறையும் என்பது குறிப்பிடத்தக்கது.
மும்பை -அகமதாபாத்
மும்பை - அகமதாபாத் திட்டத்தின் லேட்டஸ்ட் அப்டேட்
இந்தியாவின் முதல் முதன்மை திட்டமான 508 கிமீ நீளமுள்ள மும்பை - அகமதாபாத் புல்லட் ரயில் காரிடார் பணிகள் ஜப்பானின் ஷின்கான்சென் தொழில்நுட்பத்துடன் அதிவேகமாக நடந்து வருகின்றன. இந்த வழித்தடத்தின் முதல் பகுதியான குஜராத்தின் சூரத் - பிலிமோரா இடையேயான ரயில் சேவை அடுத்த ஆண்டு ஆகஸ்ட் 2027 க்குள் பொதுமக்களின் பயன்பாட்டிற்கு வரும் என்று ரயில்வே அமைச்சகம் தெரிவித்துள்ளது. இந்த வழித்தடங்களில் மணிக்கு 320 கிமீ வேகத்தில் செல்லும் போது ஏற்படும் காற்றழுத்த மாறுபாடுகளைக் கட்டுப்படுத்த அதிநவீன டன்னல் ஹூட் தொழில்நுட்பமும் இந்தியாவில் முதல்முறையாக இதனுடன் பயன்பாட்டிற்கு வர உள்ளது குறிப்பிடத்தக்கது.