அமைச்சர் செந்தில் பாலாஜி விவகாரம் - மத்திய தலைமை வழக்கறிஞரை சந்தித்த தமிழக ஆளுநர்
அமலாக்கத்துறையால் கைது செய்யப்பட்ட அமைச்சர் செந்தில் பாலாஜி நெஞ்சு வலி காரணமாக சென்னை காவேரி மருத்துவமனையில் அனுமதிக்கப்பட்டு, அறுவை சிகிச்சை செய்து, தற்போது மருத்துவர்கள் கண்காணிப்பில் உள்ளார். இதனிடையே, தமிழக அரசு அவரை இலாகா இல்லா அமைச்சராக அறிவித்தது. ஆனால் இதற்கு எதிர்ப்புத்தெரிவித்த ஆளுநர் ஆர்.என்.ரவி, அமைச்சர் செந்தில் பாலாஜியினை பதவிநீக்கம் செய்வதாக அறிவித்ததோடு, இதுகுறித்து தமிழக முதல்வருக்கு ஒரு கடிதத்தினையும் எழுதி அனுப்பினார். இதற்கு பல தரப்புகளிலிருந்து அவருக்கு எதிர்ப்புகள் எழுந்தது. தமிழக முதல்வர், இந்த விவகாரத்தினை சட்டரீதியாக சந்திக்கத்தயார் என்று தெரிவித்திருந்தார். ஆனால் சிலமணிநேரத்திலேயே, ஆளுநர் தனது உத்தரவினை நிறுத்திவைப்பதாக தெரிவித்தார். இதற்கிடையே,மத்திய உள்துறை அமைச்சர் அமித்ஷா தலையீடு காரணமாகவே ஆளுநர் தனது உத்தரவினை நிறுத்திவைத்துள்ளார் என்று கூறப்பட்டது.
நேற்று(ஜூலை.,10)உள்துறை அமைச்சர் அமித்ஷாவை நேரில் சந்தித்த ஆளுநர்
அதன்படி, அமித்ஷா மத்திய அரசின் அட்டர்னி ஜெனரல் ஆர்.வெங்கட்ரமணியிடம் இந்த விவகாரம் குறித்து ஆலோசனை செய்ய, ஆளுநருக்கு அறிவுறுத்தியதாகவும் செய்திகள் வெளியானது. இதனையடுத்து, மீண்டும் இதுகுறித்து மு.க.ஸ்டாலினுக்கு கடிதம் எழுதிய ஆளுநர், 7 நாள் பயணமாக டெல்லிக்கு புறப்பட்டு சென்றார். அதன்படி, முன்னதாக உள்துறை அமைச்சர் அமித்ஷாவை நேரில் சந்தித்த ஆளுநர், அவரிடம் தமிழக அரசியல் சூழல் மற்றும் செந்தில் பாலாஜி விவகாரம் குறித்து கலந்தாலோசித்ததாக தெரிகிறது. இந்நிலையில், இன்று(ஜூலை.,11) மத்திய அரசின் அட்டர்னி ஜெனரல் ஆர்.வெங்கட்ரமணி அவர்களை நேரில் சந்தித்துள்ளார் என்று தகவல்கள் தெரிவிக்கிறது. இந்த சந்திப்பில், ஆர்.வெங்கட்ரமணியிடம் ஆலோசனை பெற்று அமைச்சர் செந்தில் பாலாஜி விவகாரத்தில் ஆளுநர் தனது இறுதி முடிவினை எடுப்பார் என்று கருதப்படுகிறது குறிப்பிடத்தக்கது.
