வருமானத்திற்கு அதிகமாக சொத்து சேர்த்த வழக்கு - அமைச்சர் பொன்முடிக்கு 3 ஆண்டுகள் சிறை தண்டனை
செய்தி முன்னோட்டம்
கடந்த 2006-2011ம் ஆண்டுவரை திமுக ஆட்சியிலிருந்த காலக்கட்டத்தில் உயர்கல்வித்துறை அமைச்சராக பதவி வகித்தவர் அமைச்சர் பொன்முடி.
கடந்த 2011ம்.,ஆண்டு தமிழக லஞ்ச ஒழிப்புத்துறை அதிகாரிகள் இவர் மீதும் இவரது மனைவி மீதும் வருமானத்திற்கு அதிகமாக ரூ.1.75கோடி அளவில் சொத்து சேர்த்ததாக கூறி வழக்குப்பதிவு செய்தனர்.
இந்நிலையில் இந்த வழக்கின் விசாரணை சிறப்பு நீதிமன்றத்தில் தொடர்ந்து நடந்த நிலையில் கடந்த 2016ம்.,ஆண்டு அவர்மீதான குற்றச்சாட்டுகள் நிரூபிக்கப்படாத காரணத்தினால் அவரை நீதிமன்றம் விடுதலை செய்து உத்தரவிட்டது.
இதனையடுத்து கடந்த 2017ம்.,ஆண்டு லஞ்ச ஒழிப்புத்துறை அதிகாரிகள் சென்னை உயர்நீதிமன்றத்தில் இவ்வழக்கினை மேல்முறையீடு செய்தனர்.
இவ்வழக்கினை விசாரித்த நீதிபதி ஜெயச்சந்திரன், லஞ்ச ஒழிப்புத்துறை 39 சாட்சியங்களிடம் மேற்கொண்ட புலன் விசாரணை அறிக்கையினையும் ஏற்றுக்கொண்டு, கடந்த 19ம்.,தேதி தீர்ப்பு வழங்கினார்.
வழக்கு
அமைச்சர் பொன்முடி சார்பில் ஆஜரான வழக்கறிஞர் வைத்த கோரிக்கை
அதில் அவர், '64.90% வருமானத்திற்கு அதிகமாக அமைச்சர் பொன்முடியும் அவரது மனைவியும் சொத்து சேர்த்துள்ளனர் என்பது நிரூபணமாகியுள்ளது.
அதனால் அமைச்சர் பொன்முடியின் விடுதலை செல்லாது' என்று கூறியிருந்தார்.
மேலும் இன்று(டிச.,21)இவ்வழக்கின் தண்டனை குறித்த விவரங்கள் தெரிவிக்கப்படும் என்று தெரிவித்திருந்தார்.
அதன்படி இன்று காலை அமைச்சர் பொன்முடி மற்றும் அவரது நீதிமன்றத்தில் நேரில் ஆஜராகினர்.
அப்போது, இவர்களது சார்பில் ஆஜரான வழக்கறிஞர் என்.ஆர்.இளங்கோ, 'அமைச்சரின் வயதையும், உடல்நலத்தையும் கருத்தில் கொள்ள வேண்டும்' என்று கோரிக்கை வைத்ததாக கூறப்படுகிறது.
தீர்ப்பு
ரூ.50 லட்சம் அபராதம் விதிப்பு
இதனையடுத்து நீதிபதி, அமைச்சர் பொன்முடி மற்றும் அவரது மனைவி விசாலாட்சிக்கு 3 ஆண்டுகள் சிறை தண்டனை மற்றும் ரூ.50 லட்சம் அபராதம் விதித்து உத்தரவிட்டார்.
எனினும், அவர் மேல்முறையீடு செய்யும் வகையில் 30 நாட்கள் தண்டனை விதிப்பு ஒத்திவைக்கப்பட்டுள்ளது என்று தகவல்கள் தெரிவிக்கிறது.
இந்த அவகாசம் மேலும் நீடிக்குமா? என்பதும் உறுதியாக தெரியவில்லை.
இதற்கிடையே தற்போது இவரின் அமைச்சர் பதவி நீடிக்குமா?என்னும் கேள்வி அரசியல் வட்டாரத்தில் எழுந்துள்ளது என்பது குறிப்பிடத்தக்கது.