ஜி20 மாநாடு - ஜனாதிபதி தலைமையிலான விருந்து குறித்த விவரங்கள்
செய்தி முன்னோட்டம்
இந்தியா தலைமையில் இந்தாண்டு ஜி20 அமைப்பின் நிகழ்ச்சிகள் அனைத்தும் நடத்தப்பட்டு வருகிறது. 18வது ஜி20 மாநாடு டெல்லியில் வரும் செப்.,9, 10 தேதிகளில் நடக்கவுள்ளது. இதில் அமெரிக்கா, ஆஸ்திரேலியா, பிரிட்டன், ஜப்பான் உள்ளிட்ட உலக நாடுகளின் அதிபர்கள் பங்கேற்கவுள்ளனர். இந்நிலையில் இந்தியாவுக்கு வருகைத்தரும் சர்வதேசத்தலைவர்களுக்கு இந்திய ஜனாதிபதி திரௌபதி முர்மு தலைமையில் விருந்து ஒன்று ஏற்பாடு செய்யப்பட்டுள்ளது. இந்த விருந்தானது டெல்லி பிரகதி மைதானம், பாரத் மண்டபத்தில் நடக்கவுள்ளது. இதற்கான விருந்தினர் அழைப்பு பட்டியலில், நாட்டின் அனைத்து மாநில முதல்வர்கள், அமைச்சர்கள், இந்திய அரசாங்கத்தின் அனைத்து செயலாளர்கள் மற்றும் சிறப்பு விருந்தினர்கள் பெயர்கள் இடம்பெற்றுள்ளன என்று கூறப்படுகிறது. அதன்படி முன்னாள் பிரதமர்கள் டாக்டர். மன்மோகன் சிங் மற்றும் தேவ கவுடாவுக்கும் அழைப்பு விடுக்கப்பட்டுள்ளது.
மாநாடு
விருந்தினை தொடர்ந்து ஒரு சிறு கலை நிகழ்ச்சிக்கும் ஏற்பாடு
இந்நிலையில் ஜனாதிபதி தலைமையில் நடக்கும் இந்த விருந்தில் மன்மோகன் சிங் கலந்துகொள்ளவில்லை என்பதனை அவரது அலுவலக தகவல்கள் உறுதிசெய்துள்ளது. அதேபோல் தேவ கவுடாவும் உடல்நிலை குறைபாடு காரணமாக இந்த விருந்தில் பங்கேற்கவில்லை என்று தெரிவித்துள்ளார். இதனை தொடர்ந்து, காங்கிரஸ் தலைவர் சோனியா காந்தி மற்றும் எம்.பி. ராகுல் காந்தி உள்ளிட்டோர் இந்த விருந்திற்கு அழைக்கப்படாத காரணத்தினால் கலந்துகொள்ள மாட்டார்கள் என்று தெரிகிறது. மேலும், காங்கிரஸ் தலைவரும், மாநிலங்களவை எதிர்க்கட்சி தலைவருமான மல்லிகார்ஜுன கார்கேவுக்கும் அழைப்பு விடுக்கப்படவில்லை. இதனிடையே, இந்த விருந்தினை தொடர்ந்து ஒரு சிறு கலை நிகழ்ச்சிக்கும் ஏற்பாடு செய்யப்பட்டுள்ளதாம். இந்த உச்சிமாநாட்டின் செயல்பாடுகள் அனைத்துமே, ஜி20 சிறப்பு செயலாளரான முக்தேஷ் பர்தேஷியின் மேற்பார்வையின் கீழ் நடைபெறுகிறது.