2 வருடத் தடை நீங்கியது! வங்கதேச மக்களுக்கு மீண்டும் சுற்றுலா விசா வழங்குவதாக இந்தியா அறிவிப்பு
செய்தி முன்னோட்டம்
வங்கதேச குடிமக்களுக்கு இந்தியாவிற்கு வருவதற்கான சுற்றுலா விசா சேவைகளை மீண்டும் வழங்க உள்ளதாக இந்தியா அறிவித்துள்ளது. இரு நாடுகளுக்கும் இடையே நிலவி வந்த அசாதாரண சூழல் காரணமாகக் கடந்த இரண்டு ஆண்டுகளுக்கும் மேலாக முடக்கப்பட்டிருந்த இந்த சேவை, மீண்டும் தொடங்கப்படுவது இரு நாட்டு மக்களிடையேயான உறவையும், பொருளாதாரப் பரிமாற்றத்தையும் வலுப்படுத்துவதில் ஒரு முக்கிய மைல்கல்லாகக் கருதப்படுகிறது.
ஜூன் 28
ஜூன் 28 முதல் விண்ணப்பிக்கலாம் - உயர் ஆணையர் தினேஷ் திரிவேதி அறிவிப்பு
டாக்காவில் உள்ள ஜமுனா ஃபியூச்சர் பார்க் இந்திய விசா விண்ணப்ப மையத்திற்கு வியாழக்கிழமையன்று நேரில் சென்ற புதிய இந்திய உயர் ஆணையர் தினேஷ் திரிவேதி இந்த அதிகாரப்பூர்வ அறிவிப்பை வெளியிட்டார். ஜூன் 28 முதல் வங்கதேச மக்கள் தங்களது சுற்றுலா விசா விண்ணப்பங்களை வழக்கம்போல சமர்ப்பிக்கலாம் என்றும், அவசர மருத்துவத் தேவைகளுக்கான விசாக்கள் தொடர்ந்து முன்னுரிமை அடிப்படையில் தங்கு தடையின்றி வழங்கப்படும் என்றும் அவர் குறிப்பிட்டுள்ளார்.
5 நகரங்கள்
5 முக்கிய நகரங்களில் விசா மையங்கள் இயக்கம்
முதற்கட்டமாக வங்கதேசத்தின் முக்கிய ஐந்து நகரங்களான டாக்கா, ராஜஷாஹி, சிட்டகாங், சில்ஹெட் மற்றும் குல்னா ஆகிய பகுதிகளில் உள்ள மையங்கள் மூலம் இந்த சுற்றுலா விசாக்கள் விநியோகிக்கப்பட உள்ளன. எதிர்காலத்தில் இந்த சேவை மற்ற நகரங்களுக்கும் விரிவுபடுத்தப்படும் என்று கூறிய தினேஷ் திரிவேதி, முன்னதாக வங்கதேச அதிபர் முகமது சஹாபுதீனை சந்தித்து தனது தூதரகப் பொறுப்புக்களை முறைப்படி பதவியேற்றுக் கொண்டார் என்பது குறிப்பிடத்தக்கது.
விசா சேவைகள்
விசா சேவைகள் முடக்கப்பட்டதன் பின்னணி என்ன?
கடந்த 2024 ஆம் ஆண்டு வங்கதேசத்தில் ஏற்பட்ட கடுமையான அரசியல் உள்நாட்டுப் போரின் போது, அங்குள்ள இந்திரா காந்தி கலாச்சார மையம் மற்றும் 5 இந்திய விசா விண்ணப்ப மையங்கள் போராட்டக்காரர்களால் அடித்து நொறுக்கப்பட்டுத் தீக்கிரையாக்கப்பட்டன. அங்குப் பணியாற்றி வந்த இந்தியப் பணியாளர்களுக்குப் பாதுகாப்பு அச்சுறுத்தல்கள் எழுந்ததால், முகம்மது யூனுஸ் தலைமையிலான இடைக்கால அரசாங்கத்தின் காலத்தில் இந்தியா தனது விசா செயல்பாடுகளைக் கடுமையாகக் குறைத்துக் கொள்ள வேண்டிய கட்டாயத்திற்குத் தள்ளப்பட்டது.
மருத்துவ விசா
மனிதநேய அடிப்படையில் தொடர்ந்த மருத்துவ விசாக்கள்
இத்தகைய கடுமையான பாதுகாப்பு சவால்கள் நீடித்த போதிலும், புற்றுநோய் உள்ளிட்ட தீவிர சிகிச்சைகளுக்காக இந்தியாவிற்கு வர விரும்பிய வங்கதேச மக்களுக்கு மனிதநேய அடிப்படையில் மருத்துவ விசாக்களை இந்தியா தொடர்ந்து வழங்கி வந்தது. சுற்றுலா விசாக்கள் முழுமையாக முடக்கப்பட்டிருந்த நிலையிலும், நாளொன்றுக்கு சராசரியாக 1,500க்கும் மேற்பட்ட பிற அவசரக்கால விசாக்களை வழங்கி வந்த இந்தியா, தற்பொழுது நிலைமை சீரடைந்துள்ளதால் சுற்றுலா விசாக்களையும் மீண்டும் வழங்கத் தொடங்கியுள்ளது.