இஸ்ரேலில் போர் நிலை அறிவிப்பு: இஸ்ரேல் வாழ் இந்தியர்களுக்கு இந்தியா அறிவுரை
செய்தி முன்னோட்டம்
இஸ்ரேலுக்கு எதிராக பாலஸ்தீன போராளிகள் நடத்திய மிகப்பெரும் தாக்குதலைத் தொடர்ந்து இஸ்ரேலில் 'போர் நிலை' பிரகடனப்படுத்தப்பட்டுள்ளது.
இதனையடுத்து, இஸ்ரேலில் உள்ள இந்தியத் தூதரகம் இஸ்ரேல் வாழ் இந்தியர்களுக்கான அறிவுரையை வெளியிட்டுள்ளது.
இஸ்ரேலில் உள்ள இந்தியர்கள் விழிப்புடன் இருக்க வேண்டும் என்றும், பாதுகாப்பு நெறிமுறைகளைக் கடைப்பிடிக்க வேண்டும் என்றும் இந்த அறிவுரையில் அதிகாரிகள் கேட்டுக் கொண்டுள்ளனர்.
"இஸ்ரேலின் தற்போதைய சூழ்நிலையைக் கருத்தில் கொண்டு, இஸ்ரேலில் உள்ள அனைத்து இந்திய குடிமக்களும் விழிப்புடன் இருக்குமாறும், உள்ளூர் அதிகாரிகளின் அறிவுறுத்தலின்படி பாதுகாப்பு நெறிமுறைகளைக் கடைப்பிடிக்குமாறும் கேட்டுக் கொள்ளப்படுகிறார்கள். தயவுசெய்து எச்சரிக்கையுடன் செயல்படவும், தேவையற்ற நடமாட்டத்தைத் தவிர்க்கவும். மேலும், பாதுகாப்பு தங்குமிடங்களுக்கு அருகில் இருக்கவும்" என்று தூதரகம் ஒரு அறிக்கையில் தெரிவித்துள்ளது.
பிகேவ்ஜ்
இஸ்ரேலுக்குள் ஊடுருவிய பாலஸ்தீன போராளிகள்
மேலும், அவசரநிலை ஏற்பட்டால் அதிகாரிகளை தொடர்பு கொள்ளுமாறு தூதரக அதிகாரிகள் இந்திய குடிமக்களை வலியுறுத்தியுள்ளனர்.
இன்று அதிகாலை காசா பகுதியில் இருந்து இடைவிடாத ராக்கெட் தாக்குதலை நடத்திய பாலஸ்தீன பயங்கரவாதிகள், தெற்கு இஸ்ரேலின் சில பகுதிகளுக்குள் ஊடுருவினர்.
இதனால், இஸ்ரேலில் போர் நிலை அறிவிக்கப்பட்டுள்ளது.
நிலைமை தீவிரமடைந்ததால், இஸ்ரேலிய பிரதமர் பெஞ்சமின் நெதன்யாகு ஒரு வீடியோ அறிக்கையை வெளியிட்டார். அந்த வீடியோவில் அவர், "நாம் போரில் இருக்கிறோம், நாம் கண்டிப்பாக வெற்றி பெறுவோம்." என்று தெரிவித்துள்ளார்.
இதற்கிடையில், இஸ்ரேலும் பாலஸ்தீன பயங்கரவாதிகளுக்கு எதிரான மிகப்பெரும் தாக்குதலை தொடங்கியுள்ளது.
இந்த தாக்குதலுக்கு ஆபரேஷன் இரும்பு வாள் என்று பெயரிடப்பட்டுள்ளது.