நூஹ் வன்முறை: காங்கிரஸ் எம்.எல்.ஏ-வை கைது செய்தது ஹரியானா போலீஸ்
ஹரியானா மாநிலத்தின் ஃபெரோஸ்பூரைச் சேர்ந்த காங்கிரஸ் தலைவரும், எம்எல்ஏவுமான, ஜிர்கா மம்மன் கான், ஜூலை 31 அன்று, நூஹ் மாவட்டத்தில் நடந்த வகுப்புவாத கலவரத்துடன் தொடர்புடையதாகக் கூறி கைது செய்யப்பட்டார். குற்றம் சாட்டப்பட்ட கான், கடந்த வாரம் நுஹ் காவல்துறையால் விசாரிக்கப்பட்டதாகவும், வெள்ளிக்கிழமை மீண்டும் நீதிமன்றத்தில் ஆஜர்படுத்தப்படுவார் என்றும் கூறப்படுகிறது. விஸ்வ ஹிந்து பரிஷத்(VHP) ஏற்பாடு செய்த மத அணிவகுப்பின் மீது ஒரு முஸ்லீம் கும்பல் கற்களை வீசியதாக துவங்கிய வகுப்புவாத வன்முறை, ஜூலை 31 அன்று நூஹ்வை உலுக்கிய பின்னர் அருகிலுள்ள பகுதிகளுக்கும் பரவியது. இந்த மோதலில் ஆறு பேர் உயிரிழந்த நிலையில், குருகிராம், பல்வால் மற்றும் ஃபரிதாபாத் போன்ற அண்டை பகுதிகளுக்கு வன்முறை பரவியதால் 200க்கும் மேற்பட்டோர் காயம் அடைந்தனர்.
குற்றசாட்டை மறுத்த ஜிர்கா மம்மன் கான்
கைதிற்கு முன்னதாக, காங்கிரஸ் தலைவர் கான், பஞ்சாப் மற்றும் ஹரியானா உயர் நீதிமன்றத்தை அணுகினார். வன்முறை வெடித்தபோது அவர் நூஹ்வில் இல்லாததால், இந்த வழக்கில் தன்னை பொய்யாக சிக்க வைத்ததாகக் கூறினார். இருப்பினும், "ஆதாரங்களின் படி" கான் ஒரு குற்றவாளி என ஹரியானா காவல்துறை, நீதிமன்றத்தில் தெரிவித்தது. தங்கள் கூற்றை உறுதிப்படுத்தும் வகையில், தங்களிடம் தொலைபேசி பதிவுகள் மற்றும் பிற ஆதாரங்கள் இருப்பதாகவும் அவர்கள் கூறினர். விசாரணையை அக்டோபர் 19ஆம் தேதிக்கு நீதிமன்றம் ஒத்திவைத்தது. இதற்கிடையில், இதே வழக்கில் பசு காவலர் மற்றும் பஜ்ரங் தள தலைவர் மோனு மானேசர் என்பவரும் கைது செய்யப்பட்டு, தற்போது 14 நாட்கள் நீதிமன்ற காவலில் உள்ளார்.
