கேரளா பள்ளியில் முன்னாள் மாணவர் துப்பாக்கி சூடு
செய்தி முன்னோட்டம்
மாணவர்கள், ஆசிரியர்களைத் தாக்குவது முதல் மாணவர்கள் ஒருவரையொருவர் தாக்குவது என, பள்ளி மற்றும் கல்லூரி மாணவர்களிடையே வன்முறை நடவடிக்கைகள் இந்தியாவில் அதிகரித்து வருகிறது.
இந்த நேரத்தில், கேரளாவின் திருச்சூர் மாவட்டத்திலுள்ள விவேகோதயம் ஆண்கள் மேல்நிலைப் பள்ளியில் நேற்று, (செவ்வாய்கிழமை) 18 வயது இளைஞன் ஒருவன், துப்பாக்கியால் சுட்டது, மாணவர்கள் மற்றும் ஊழியர்களிடையே பீதியை ஏற்படுத்தியுள்ளது.
முலாயம் பகுதியைச் சேர்ந்த ஜெகன் என அடையாளம் காணப்பட்ட அவர், அந்தப் பள்ளியின் முன்னாள் மாணவர் என அவரை கைது செய்த காவல்துறையினர் தெரிவித்தனர்.
முதலில், பள்ளியின் முதல்வர் அறைக்குள் நுழைந்த ஜெகன், பின்னர் வகுப்பறைக்குள் புகுந்து யாரையும் குறிவைக்காமல், வானத்தை நோக்கி பலமுறை சுட்டதாக கூறப்படுகிறது.
மேலும், பள்ளி ஆசிரியர்கள் மற்றும் ஊழியர்களை மிரட்டியதாகவும் கூறப்படுகிறது.
card 2
கைது செய்யப்பட்ட மாணவர் மதுபோதையில் இருக்கலாம் என காவல்துறையினர் சந்தேகம்
இந்த சம்பவம் குறித்து செய்தியாளர்களிடம் பேசிய பள்ளி ஊழியர் ஒருவர், "நாங்கள் எங்கள் அலுவலக வேலைகளை செய்து கொண்டிருந்த போது, வெளியில் இருந்து ஒருவர் உள்ளே நுழைவதை பார்த்தோம்".
"அவர் சைக்கிள் நிறுத்துமிடத்திற்குச் சென்று சைக்கிள்களை எட்டி உதைத்தார். பின்னர் நேராக ப்ரின்சிபாலின் அறைக்குள் நுழைந்தார். அப்போதுதான் அவர் கையிலிருந்த துப்பாக்கியை கவனித்தோம். உடனே, காவல்துறையினருக்கு தெரிவித்தோம்" எனக்கூறினார்.
தகவல் கிடைத்ததும், பள்ளிக்கு விரைந்த போலீசார், ஜெகனை கைது செய்தனர். தாக்குதலுக்கான காரணம் இன்னும் தெரியவில்லை, மேலும் போலீசார் அவரிடம் விசாரணை நடத்தி வருகின்றனர்.
நியூஸ் மினிட் செய்திகள்படி, அந்த வாலிபர் ஏற்கனவே தனது முந்தைய பள்ளியில் சிக்கலை ஏற்படுத்தியதால் தான், விவேகோதயம் பள்ளிக்கு மாற்றப்பட்டார். எனினும், பள்ளி இறுதித்தேர்வுக்கு அவர் வரவில்லை.