ராகுல் காந்தியை புகழ்ந்து பதிவிட்டதை நீக்கிய அதிமுக முன்னாள் அமைச்சர் செல்லூர் ராஜூ
செய்தி முன்னோட்டம்
நேற்று முன்னாள் அதிமுக அமைச்சர் செல்லூர் ராஜு, காங்கிரஸ் தலைவர் ராகுல் காந்தியை புகழ்ந்து ஒரு பதிவை இட்டார்.
'நான் பார்த்து நெகிழ்ந்து ரசிக்கும் இளம் தலைவர்' என்று ராகுல் காந்தியின் படத்துடன் தனது எக்ஸ் தளத்தில் பதிவிட்டிருந்தார்.
செல்லூர் ராஜுவின் இந்த பதிவை, மாநில காங்கிரஸ் தலைவர் செல்வப்பெருந்தகை வரவேற்றார்.
எனினும், இந்த பதிவு, அதிமுக முகாமில் பரபரப்பை ஏற்படுத்தியுள்ளது.
இது குறித்து செல்லூர் ராஜூ தரப்பில் விசாரித்தபோது, "ராகுலின் எளிமைக்காக சாதாரணமாக போட்ட பதிவுதான், வேறு ஒன்றுமில்லை'' என்று தெரிவிக்கிறார்கள்.
கட்சியின் மூத்த தலைவர்கள் இது கட்சியின் நிலைப்பாட்டிற்கு எதிரானது எனவும் அது அவரின் தனிப்பட்ட கருத்து என கூறிய நிலையில், தற்போது அந்த பதிவை நீக்கியுள்ளார் செல்லூர் ராஜு.
செல்லூர் ராஜு
சர்ச்சைகளுக்கு பெயர் போன செல்லூர் ராஜு
அமைச்சராக இருந்தபோதும் சரி, தற்போது எதிர்க்கட்சி எம்.எல்.ஏ-வாக இருக்கும்போதும் சரி கட்சி கூட்டத்திலும், செய்தியாளர் கூட்டத்திலும் அதிரடியாக எதையாவது பேசி மட்டுமல்ல, தெர்மாகோல் விடுவது போன்ற செயலாலும் பரபரப்பை உண்டு பண்ணியவர் செல்லூர் ராஜூ என்பது அனைவருக்கும் தெரியும்.
இந்நிலையில் கட்சியின் நிலைபாட்டுக்கு எதிராக 'மத்தியில் மோடி வந்தாலும், ராகுல் வந்தாலும் ஏற்றுக்கொள்வோம்' என்று ஏற்கெனவே இவர் பேசியதும் சர்ச்சையானது.
அதேபோல, ' எம்.ஜி.ஆரைப் போல சம்பாதித்த பணத்தை மக்களுக்கு செலவு செய்ய நினைப்பவர் நடிகர் விஜய்' என பேசி கட்சினரையே அதிர வைத்தார்.
இப்படி அடிக்கடி அதிரடியாகப் பேசி வந்த செல்லூர் ராஜூ தற்போது காங்கிரஸ் தலைவரை புகழ்ந்துள்ளார்.