பாமக யாருக்குச் சொந்தம்? ராமதாஸ் கடிதத்திற்கு இந்திய தேர்தல் ஆணையம் பதில்
செய்தி முன்னோட்டம்
பாட்டாளி மக்கள் கட்சியின் (பாமக) நிறுவனர் ராமதாஸ் மற்றும் கட்சியின் தற்போதையத் தலைவர் அன்புமணி ராமதாஸ் இடையே நீடித்து வந்த மோதலில், இந்தியத் தேர்தல் ஆணையம் ஒரு முக்கிய முடிவை வெளியிட்டுள்ளது. அதன்படி, பாமகவின் தலைவராக அன்புமணி ராமதாஸே நீடிப்பார் என்று தேர்தல் ஆணையம் அதிகாரபூர்வமாக அறிவித்துள்ளது. இதனால் ராமதாஸ் மற்றும் அவரது ஆதரவாளர்கள் மத்தியில் அதிர்ச்சி ஏற்பட்டுள்ளது. கட்சியில் தான் தான் தகுதிவாய்ந்த தலைவர் என்று கூறி ராமதாஸ், கடந்த நவம்பர் 11ஆம் தேதி தேர்தல் ஆணையத்திற்கு ஒரு கடிதம் அனுப்பியிருந்தார். இதற்குப் பதில் அளித்த தேர்தல் ஆணையம், தேர்தல் ஆணையத்தின் பதிவுகளின்படி, பாட்டாளி மக்கள் கட்சியின் தலைவராக அன்புமணி ராமதாஸின் பதவிக்காலம் ஆகஸ்ட் 1, 2026 வரை உள்ளதாக தெரிவித்துள்ளது.
அதிருப்தி
ராமதாஸ் தரப்பின் அதிருப்தி
இந்தக் கட்சி உரிமை குறித்துத் தேவைப்பட்டால் நீதிமன்றத்தின் மூலம் வழக்குத் தொடரலாம் என்று ராமதாஸுக்கு அனுப்பிய கடிதத்தில் தேர்தல் ஆணையம் தெளிவாகக் குறிப்பிட்டுள்ளது. தேர்தல் ஆணையத்தின் இந்த முடிவைக் கண்டித்துள்ள பாமகவின் ராமதாஸ் பிரிவைச் சேர்ந்த எம்எல்ஏ ஜி.கே.மணி, "2023ஆம் ஆண்டு பொதுக்குழு நடைபெற்றதாக அன்புமணி ராமதாஸ் தரப்பு போலி ஆவணங்களைத் தேர்தல் ஆணையத்தில் சமர்ப்பித்துள்ளது. இந்த மோசடியான ஆவணத்தை ஏற்று ஆணையம் அவருக்குச் சாதகமான உத்தரவைப் பிறப்பித்துள்ளது. தேர்தல் ஆணையமே முறைகேட்டில் ஈடுபட்டுள்ளதாக நாங்கள் நம்புகிறோம். இதற்கு எதிராக ஜனநாயக ரீதியான போராட்டமும் நீதிமன்றத்தில் வழக்கும் தொடர்வோம்" என்று செய்தியாளர்களிடம் தெரிவித்தார்.