அமைச்சர் செந்தில் பாலாஜியின் தம்பியை கைது செய்யவில்லை: அமலாக்கத்துறை அறிக்கை
சட்டவிரோதமாக பண பரிமாற்றம் செய்த வழக்கில் கைது செய்யப்பட்ட அமைச்சர் செந்தில் பாலாஜியை, பல சட்ட போராட்டங்களுக்கு பிறகு, சில தினங்களுக்கு முன்னர் காவலில் எடுத்து விசாரித்தது, அமலாக்கத்துறை. அவரது விசாரணை நிறைவடைந்த நிலையில், அவருடைய நீதிமன்ற காவல் வரும் 25ம் தேதி வரை நீட்டிக்கப்பட்டு, மீண்டும் புழல் சிறையில் அடைக்கப்பட்டார், செந்தில் பாலாஜி. இந்நிலையில், செந்தில் பாலாஜிக்கு உடந்தையாக இருந்ததற்காகவும், சட்டவிரோத பண பரிவர்த்தனை செய்ததாகவும், அமைச்சர் செந்தில் பாலாஜியின் சகோதரர் அசோக்குமார் மீதும் அமலாக்கத்துறை வழக்குப்பதிவு செய்திருந்தது. விசாரணைக்கு வருமாறு, அசோக் குமாருக்கு சம்மன் அனுப்பப்பட்டது. ஆனால், உடல்நிலையை காரணம் காட்டி அவர் காலம் ஆஜர் ஆகாமல் இருந்தார்.
கைது ஆனாரா அசோக் குமார்?
இந்நிலையில், அசோக் குமாரின் மனைவிக்கும் சென்ற வாரம் அமலாக்க துறையினரின் நோட்டீஸ் பறந்தது. அசோக் குமாரின் சொத்துக்கள் முடக்கப்பட்டதாகவும் கூறப்பட்டது. இதனிடையே, நேற்று, அசோக் குமாரை கேரளவின் கொச்சியில் அமலாக்கத்துறையினர் கைது செய்ததாக தகவல் வெளியானது. தற்போது அதை மறுத்து செய்தி வெளியிட்டுள்ளது அமலாக்கத்துறை. அசோக் குமார் இன்னும் கைது செய்யப்படவில்லை என்றும், அவர் கைது செய்யப்பட்டதாக வெளியான தகவல் தவறானது என்றும் அமலாக்கத்துறை தெரிவித்துள்ளது. அதுமட்டுமின்றி, 4 முறை சம்மன் அனுப்பியும், அசோக் குமார் விசாரணைக்கு இன்னும் ஆஜராகவில்லை என்றும், அசோக் குமாரின் மனைவி உள்ளிட்டோரும் பதில் அளிக்கவில்லை என்றும் தெரிவித்துள்ளது
