முரசு புயல் : காவலி அருகே கரையை கடக்க வாய்ப்பு, சென்னைக்கு கனமழை எச்சரிக்கை
செய்தி முன்னோட்டம்
தென்மேற்கு மற்றும் அதனை ஒட்டிய மேற்கு மத்திய வங்கக்கடல் பகுதியில் நிலைகொண்டிருந்த ஆழ்ந்த காற்றழுத்தத் தாழ்வு மண்டலம், இன்று காலை தீவிரமடைந்து முரசு புயலாக உருவெடுத்துள்ளதாக இந்திய வானிலை ஆய்வு மையம் அதிகாரப்பூர்வமாக அறிவித்துள்ளது. மேற்கு-வடமேற்கு திசையில் நகர்ந்து வரும் இந்தப் புயல், மேலும் வலுப்பெற்று தீவிர புயலாக மாறி, வரும் நவம்பர் 3-ஆம் தேதி அதிகாலை தெற்கு ஆந்திராவின் நெல்லூர் மற்றும் காவலிக்கு இடைப்பட்ட பகுதியில் கரையை கடக்கக்கூடும் எனக் கணிக்கப்பட்டுள்ளது.
சென்னைக்கு மழை வாய்ப்பு
கரையைக் கடக்கும் பாதை மாற்றம்
வானிலை முன்னறிவிப்பு மாதிரிகளின்படி, புயல் கரையைக் கடக்கும் பாதை சற்று தெற்கு நோக்கி இறங்கி ஆந்திராவின் காவலி மற்றும் நெல்லூர் பகுதியை ஒட்டி மையம் கொண்டு நகர்கிறது.
இதனால் புயலின் அடர்ந்த மழை மேகக் கூட்டங்கள் சென்னை, திருவள்ளூர், காஞ்சிபுரம், செங்கல்பட்டு (KTCC) மண்டலத்திற்குள் நுழையும் வாய்ப்பு உறுதியாகியுள்ளது.
இன்று இரவு முதல் நாளை காலை வரை புயலின் வெளிச்சுற்று மேகங்கள் இப்பகுதியைக் கடக்கும் என்பதால், சென்னையில் பரவலாக நல்ல மழையும், சில இடங்களில் கனமழையும் பதிவாக வாய்ப்புள்ளது.
அதேநேரத்தில் புயலின் மிகத் தீவிர கனமழைப் பகுதி ஸ்ரீஹரிகோட்டா முதல் நெல்லூர் வரையிலான கடலோரப் பகுதியிலேயே குவியும் எனக் கணிக்கப்பட்டுள்ளது.
காற்றின் வேகம்
வட தமிழகத்திற்கு எச்சரிக்கை
புயல் கரையை நெருங்கும் போதும் கடக்கும் போதும் மணிக்கு 100 முதல் 110 கி.மீ. வேகத்திலும், அவ்வப்போது 120 கி.மீ. வரையிலும் பலத்த காற்று வீசக்கூடும் என எச்சரிக்கப்பட்டுள்ளது.
புயலின் நேரடித் தாக்குதல் ஆந்திரக் கரையில் இருந்தாலும், தமிழகத்தில் சென்னை, திருவள்ளூர், காஞ்சிபுரம், செங்கல்பட்டு, ராணிப்பேட்டை மற்றும் வேலூர் ஆகிய மாவட்டங்களில் அடுத்த இரு தினங்களுக்கு மிதமானது முதல் கனமழை பெய்யக்கூடும் என வானிலை ஆய்வு மையம் எச்சரித்துள்ளது.
கடலோரப் பகுதி மீனவர்கள் மறு அறிவிப்பு வரும் வரை ஆழ்கடல் பகுதிகளுக்குச் செல்ல வேண்டாம் என அறிவுறுத்தப்பட்டுள்ளனர்.