மிக்ஜாம் புயல் எதிரொலி - சென்னை உயர்நீதிமன்றத்திற்கு விடுமுறை
வங்கக்கடலில் கிழக்கு தென்கிழக்கு பகுதிகளில் மையம் கொண்டுள்ள 'மிக்ஜாம்' புயல் காரணமாக நேற்று(டிச.,3) இரவு முதல் சென்னையில் சூறாவளி காற்றுடன் கனமழை பெய்து வருகிறது. தொடர் மழை காரணமாக சென்னை முழுவதும் பல்வேறு சாலைகளில் மழைநீர் வெள்ளம் போல் பெருக்கெடுத்து ஓடி கொண்டிருக்கிறது. இதன் காரணமாக வாகன ஓட்டிகள் பெரும் சிரமத்திற்கு ஆளாகியுள்ளனர். இந்நிலையில் சென்னை உயர்நீதிமன்றத்திற்கு புயல் காரணமாக இன்று(டிச.,4) விடுமுறை அளிக்கப்பட்டுள்ளது. இதனை தொடர்ந்து சென்னை மாவட்டத்திலுள்ள அனைத்து நீதிமன்றங்களுக்கும் விடுமுறை என்றும் உயர்நீதிமன்ற பதிவுத்துறையின் சுற்றறிக்கையில் குறிப்பிடப்பட்டுள்ளது. மேலும், செங்கல்பட்டு, காஞ்சிபுரம், திருவள்ளூர் உள்ளிட்ட மாவட்டங்களின் முதன்மை அமர்வு நீதிபதிகள் நீதிமன்றத்திற்கான விடுமுறையினை அறிவிக்கலாம் என்றும் சென்னை உயர் நீதிமன்றம் பதிவுத்துறை தெரிவித்துள்ளது.
