நெருங்கும் டித்வா புயல்: 9 துறைமுகங்களில் 4ஆம் எண் புயல் கூண்டு ஏற்றம்
செய்தி முன்னோட்டம்
வங்கக்கடலில் உருவாகியுள்ள டித்வா புயல் வடக்கு-வடமேற்கு திசையில் நகர்ந்து வருவதன் காரணமாகத் தமிழகம் மற்றும் புதுச்சேரியில் உள்ள 9 துறைமுகங்களில் 4ஆம் எண் புயல் எச்சரிக்கை கூண்டு ஏற்றப்பட்டுள்ளது. இந்தப் புயல் மணிக்கு 8 கிமீ வேகத்தில் நகர்ந்து வருகிறது. இதையொட்டி சென்னை, எண்ணூர், காட்டுப்பள்ளி, கடலூர், நாகப்பட்டினம், புதுச்சேரி, காரைக்கால் உள்ளிட்ட 9 துறைமுகங்களில் 4ஆம் எண் புயல் எச்சரிக்கை கூண்டு ஏற்றப்பட்டுள்ளது. இந்த எச்சரிக்கை கூண்டு, புயலின் காரணமாகத் துறைமுகத்தில் உள்ள கப்பல்களுக்கு ஆபத்து உள்ளது என்பதையும், கடலோரப் பகுதி மக்கள் எச்சரிக்கையுடன் இருக்க வேண்டும் என்பதையும் அறிவுறுத்துவதற்காக ஏற்றப்படுகிறது.
தற்போதைய நிலை
புயலின் தற்போதைய நிலை
டித்வா புயல் தற்போது சென்னைக்குத் தென் கிழக்கே சுமார் 400 கிமீ தொலைவில் மையம் கொண்டுள்ளது. இந்தப் புயல் வடக்கு-வடமேற்கு திசையில் நகர்ந்து நவம்பர் 30ஆம் தேதி வட தமிழ்நாடு, புதுவை மற்றும் ஆந்திரக் கடற்கரைகளுக்கு அருகே தென்மேற்கு வங்கக்கடலை வந்தடையும் என்று இந்திய வானிலை ஆய்வு மையம் தெரிவித்துள்ளது. இந்தப் புயல் காரணமாக டெல்டா மாவட்டங்களில் ஏற்கனவே கனமழை பெய்து வருகிறது. கடலோரப் பகுதிகளில் வசிக்கும் மீனவர்கள் மற்றும் பொதுமக்கள் பாதுகாப்பாக இருக்குமாறு அறிவுறுத்தப்பட்டுள்ளனர். மேலும், பல்வேறு மாவட்டங்களில் இன்று பள்ளி மற்றும் கல்லூரிகளுக்கு விடுமுறை அறிவிக்கப்பட்டதும் குறிப்பிடத்தக்கது.