"அடுத்த எதிர்க்கட்சிகள் கூட்டம் மும்பையில் நடைபெறும்": மல்லிகார்ஜுன கார்கே
செய்தி முன்னோட்டம்
2024ஆம் ஆண்டு பொது தேர்தலில் பாஜக கூட்டணி கட்சிகளை(NDA) எப்படி வீழ்த்துவது என்பதை திட்டமிட 26 எதிர்க்கட்சிகளின் உயர்மட்டத் தலைவர்கள் இன்று(ஜூலை 18) பெங்களூருவில் கூடினர்.
இந்த புதிய 26 எதிர்க்கட்சிகளின் கூட்டணிக்கு இந்திய தேசிய ஜனநாயக உள்ளடக்கிய கூட்டணி(INDIA) என்று பெயரிடப்பட்டுள்ளது.
இந்த கூட்டத்திற்கு பிறகு செய்தியாளர்களை சந்தித்த மேற்கு வங்க முதல்வரும் திரிணாமுல் காங்கிரஸ் கட்சி தலைவருமான மம்தா பானர்ஜி, "INDIA-வை எதிர்க்க பாஜக தயாரா?" என்று பாஜகவுக்கு சவால்விட்டார்.
தொடர்ந்து பேசிய அவர், "நாங்கள் எங்கள் தாய்நாட்டை நேசிக்கிறோம். நாங்கள் நாட்டின் தேசப்பற்றுள்ள மக்கள். நாடு, உலகம், விவசாயிகள் ஆகியோருக்காக தான் நாங்கள் இருக்கிறோம்." என்று கூறினார்.
சிஜி
"சிறுபான்மையின மக்களை பாஜக அச்சுறுத்துகிறது": மம்தா பானர்ஜி
"மேற்கு வங்கம் மற்றும் மணிப்பூரில் உள்ள இந்துக்கள், தலித்துகள், சிறுபான்மையினர், விவசாயிகள் ஆகியோர் அரசுகளை வாங்குவதும் விற்பதுமாக இருக்கும் பாஜகவால் அச்சுறுத்தப்படுகிறார்கள்." என்றும் அவர் கூறினார்.
அடுத்த எதிர்க்கட்சி கூட்டம் மும்பையில் நடைபெறும் என்றும், அங்கு 11 பேர் கொண்ட ஒருங்கிணைப்புக் குழு அமைக்கப்படும் என்றும் காங்கிரஸ் தலைவர் மல்லிகார்ஜுன கார்கே அறிவித்தார்.
டெல்லி முதல்வர் அரவிந்த் கெஜ்ரிவால், சிவசேனா(யுபிடி) தலைவர் உத்தவ் தாக்கரே, காங்கிரஸ் தலைவர் ராகுல் காந்தி ஆகியோரும் இந்த செய்தியாளர் கூட்டத்தில் பேசினர்.
தமிழக முதல்வர் மு.க.ஸ்டாலின் உள்ளிட்ட தலைவர்கள் விமானத்திற்கு விரைந்து செல்ல வேண்டி இருந்ததால் அவர்கள் இந்த செய்தியாளர் சந்திப்பில் கலந்து கொள்ளவில்லை.