தோனி கஃபேவில் காபி, நீலாங்கரையில் விருந்து! ராகுல் காந்தியுடன் முதலமைச்சர் விஜய் திடீர் ஆலோசனை
செய்தி முன்னோட்டம்
காங்கிரஸ் கட்சி சார்பில் சென்னை தீவுத்திடலில் ஏற்பாடு செய்யப்பட்டுள்ள மாணவர்களின் குரல் என்ற சிறப்பு நிகழ்ச்சியில் பங்கேற்பதற்காக மக்களவை எதிர்கட்சித் தலைவர் ராகுல் காந்தி சென்னை வந்துள்ளார். சென்னை விமான நிலையம் வந்தடைந்த அவருக்குக் காங்கிரஸ் கட்சியினர் உற்சாக வரவேற்பு அளித்தனர். அதைத் தொடர்ந்து, அவர் நீலாங்கரையில் உள்ள முதலமைச்சர் விஜய்யின் இல்லத்திற்கு நேரில் சென்று சந்தித்துப் பேசினார். இந்த சந்திப்பு தமிழக அரசியல் வட்டாரத்தில் பெரும் கவனத்தைப் பெற்றுள்ளது.
மதிய விருந்து
நீலாங்கரை இல்லத்தில் மதிய விருந்து உபசரிப்பு
முதலமைச்சர் விஜய்யின் நீலாங்கரை இல்லத்திற்கு சென்ற ராகுல் காந்தியை அவர் இன்முகத்துடன் வரவேற்றார்.
அப்போது ராகுல் காந்திக்கு முதலமைச்சர் விஜய் சிறப்பு மதிய விருந்து அளித்து உபசரித்தார்.
விருந்திற்கு பிறகு, இருவரும் சுமார் ஒரு மணி நேரத்திற்கும் மேலாக தனியாக அமர்ந்து முக்கிய அரசியல் நிலவரங்கள் குறித்து ஆலோசனையில் ஈடுபட்டனர்.
இந்த சந்திப்பின் போது இரு தலைவர்களும் பரஸ்பரம் நல்வாழ்த்துகளை பகிர்ந்து கொண்டதாக கட்சியின் முக்கிய நிர்வாகிகள் தரப்பில் தெரிவிக்கப்பட்டுள்ளது.
எம்எஸ் தோனி
எம்எஸ் தோனியின் 7Padel கஃபேவில் காபி
நீலாங்கரை இல்ல ஆலோசனையைத் தொடர்ந்து, இருவரும் சென்னை பாலவாக்கம் பகுதியில் அமைந்துள்ள பிரபல கிரிக்கெட் வீரர் எம்எஸ் தோனிக்கு சொந்தமான 7Padel கஃபேவிற்கு ஒன்றாக சென்றனர்.
அங்கு இருவரும் மிக சாதாரண மனிதர்களைப் போல அருகருகே அமர்ந்து காபி அருந்தியபடியே சிறிது நேரம் உரையாடினர்.
விளையாட்டு வீரருக்கு சொந்தமான இடத்தில் இரு முக்கிய அரசியல் தலைவர்களும் ஒன்றாகக் காபி அருந்திய காட்சிகள் சமூக வலைதளங்களில் வெளியாகி ரசிகர்களாலும் பொதுமக்களாலும் வெகுவாகப் பகிரப்பட்டு வருகின்றன.
தீவுத்திடல் நிகழ்ச்சி
மாலை தீவுத்திடல் நிகழ்ச்சியில் பங்கேற்பு
பாலவாக்கம் கஃபே சந்திப்பை முடித்துக் கொண்டு ராகுல் காந்தி மாலை தீவுத்திடலில் நடைபெறும் மாணவர் சந்திப்பு நிகழ்ச்சிக்கு புறப்பட்டு சென்றார்.
மாணவர்களின் குரல் என்ற தலைப்பில் நடைபெறும் இந்த நிகழ்ச்சியில் ஆயிரக்கணக்கான மாணவ, மாணவிகள் பங்கேற்க உள்ளனர்.
அங்கு அவர்களின் கேள்விகளுக்கு ராகுல் காந்தி நேரடியாகப் பதிலளிக்க உள்ளார்.
முதலமைச்சர் விஜய்யுடனான இந்த திடீர் சந்திப்பு மற்றும் தோனி கஃபே உரையாடல் ஆகியவை இன்றைய அரசியல் நிகழ்வுகளில் முக்கிய மையப்புள்ளியாக மாறியுள்ளன.