சென்னை ராஜீவ் காந்தி மருத்துவமனை-இதய சிகிச்சை பெற வந்த பெண்ணிற்கு கை அகற்றம்
செய்தி முன்னோட்டம்
சென்னை ராஜீவ் காந்தி அரசு மருத்துவமனைக்கு இதய சிகிச்சைப்பெற வந்த பெண்ணின் வலது கை அகற்றப்பட்டுள்ள விவகாரம் தற்போது பெரும் சர்ச்சையினை ஏற்படுத்தியுள்ளது.
சென்னை பழைய வண்ணாரப்பேட்டை பகுதியினை சேர்ந்தவர் ஜீனாத்.
இவரது மனைவி ஜோதி(32), இவர் நெஞ்சுவலி காரணமாக கடந்த சிலத்தினங்களாக தனியார் மருத்துவமனையில் சிகிச்சைப்பெற்று வந்த நிலையில், மேல் சிகிச்சைக்காக ராஜீவ் காந்தி அரசு மருத்துவமனையில் கடந்த 15ம் தேதி அனுமதிக்கப்பட்டுள்ளார் என்று கூறப்படுகிறது.
இவருக்கு ரத்தநாளங்களில் அடைப்பு உள்ளதா? என்பதை கண்டறிய ஆஞ்சியோ சிகிச்சையளித்த மருத்துவர்கள், பெரியளவில் ரத்தநாள அடைப்பு ஏதுமில்லை என்று கூறியுள்ளனர்.
அதே சமயம், ஜோதிக்கு ரத்தம் உறைந்த காரணத்தினால் அவரது வலது கை மற்றும் 2 கால்கள் மிகவும் கருப்பாகி மோசமான நிலையில் காணப்பட்டுள்ளது.
குற்றச்சாட்டு
மருத்துவர்கள் மீது குற்றச்சாட்டு
இதனால் மருத்துவர்கள் உயிரினை காப்பாற்ற வேண்டும் என்னும் காரணத்தினால் அவரது வலது கையினை நேற்று(செப்.,26)அகற்றியுள்ளனர்.
இந்நிலையில் இதுகுறித்து ஜீனாத், "தனியார் மருத்துவமனையில் ஆஞ்சியோ சிகிச்சைக்கு அதிக கட்டணம் என்பதால் தான் அரசு மருத்துவமனைக்கு வந்தோம். இங்கு ஆஞ்சியோ செய்த மருத்துவர்கள் ரத்தநாளத்தில் அடைப்பு ஏதுமில்லை என்று கூறிவிட்டு, ரத்தம் உறைந்த காரணத்தினால் வலது கையினை அகற்றியதாக கூறுகிறார்கள்" என்றும்,
"மேலும் ரத்த உறைதல் சீராகவில்லை என்றால், இடது காலையும் அகற்ற வேண்டும் என்று கூறுகிறார்கள்"என்று வேதனை தெரிவித்துள்ளார்.
தொடர்ந்து அவர், இதயப்பரிசோதனைக்கு வந்தவருக்கு கையினை அகற்றுகிறார்கள் என்றும், மருத்துவர்களின் கவனக்குறைவு அல்லது தவறான சிகிச்சை தான் இதற்கு காரணம் என்றும் குற்றம்சாட்டியுள்ளார்.
மேலும் தனக்கு நியாயம் வேண்டும் என்றும் கோருகிறார் என்பது குறிப்பிடத்தக்கது.