கோடை காலம் என்பதால் வழக்கறிஞர்கள் கவுன் அணிவதில் விலக்கு - சென்னை உயர்நீதிமன்றம்
செய்தி முன்னோட்டம்
தமிழ்நாடு மாநிலத்தில் கோடை காலம் துவங்கி வெயில் வெளுத்து வாங்கி வருகிறது. இதனையடுத்து கோடை காலத்தில் கருப்பு கவுன் அணிவதில் இருந்து வழக்கறிஞர்களுக்கு விலக்கு அளித்துள்ளதாக சென்னை உயர் நீதிமன்றம் அறிவித்துள்ளது. நீதிமன்றத்தில் ஆஜராகும் வழக்கறிஞர்கள் கருப்பு மற்றும் வெள்ளை உடைக்கு மேல் கருப்பு நிறத்தில் கோட், கழுத்தில் வெள்ளை நிறத்தில் ஒரு பட்டை, கருப்பு கவுன் ஆகியவற்றை அணிந்து ஆஜராக வேண்டும் என்பது விதிகளில் ஒன்று. இந்நிலையில் கோடை வெயிலின் தாக்கத்தினை கருத்தில் கொண்டு ஆண்டுதோறும் மார்ச் மாதம் முதல் ஜூலை மாதம் வரை கருப்பு கவுன் அணிவதில் இருந்து விலக்கு அளிக்க வேண்டும் என்று பார் அசோசியேஷன் சார்பில் சென்னை உயர் நீதிமன்றத்தில் இந்தாண்டு துவக்கத்தில் கோரிக்கை ஒன்று வைக்கப்பட்டது.
நீதிமன்றம்
ஏப்ரல் 1ம் தேதி முதல் ஜூன் 30ம் தேதி வரை விலக்கு
இந்த கோரிக்கையானது அனைத்து நீதிபதிகள் அடங்கிய கூட்டத்தில் முன்வைக்கப்பட்டு பரிசீலிக்கப்பட்டது. அதனை தொடர்ந்து அந்த கூட்டத்தில் எடுக்கப்பட்ட முடிவுகள் குறித்து சென்னை உயர்நீதிமன்ற தலைமை பதிவாளர் பி.தனபால் அறிவிப்பு ஒன்றினை வெளியிட்டுள்ளார். அந்த அறிவிப்பின் படி, ஆண்டுதோறும் ஏப்ரல் 1ம் தேதி முதல் ஜூன் 30ம் தேதி வரை கருப்பு கவுன் அணிவதில் இருந்து வழக்கறிஞர்களுக்கு விலக்கு அளிக்கப்படுவதாக தெரிவிக்கப்பட்டுள்ளது. அதே சமயம், கருப்பு கோட் மற்றும் கழுத்தில் வெள்ளை நிற பட்டை கட்டாயமாக அணிய வேண்டும் என்றும் தெரிவிக்கப்பட்டுள்ளது என்பது குறிப்பிடத்தக்கது.