சென்னையில் இரவில் தனியே செல்லும் பெண்களிடம் அத்துமீறிய பைக் டாக்சி ஓட்டுநர் கைது
சென்னை மாநகர் டிபி சத்திரம் காவல் நிலையத்தில், 42 வயது மதிக்கத்தக்க பெண் ஒருவர் புகார் அளித்துள்ளார். அதில், நேற்று முன்தினம் 13 வயதுடைய தனது மகள், தனது ட்யூஷனை முடித்துவிட்டு வீடு திரும்புகையில், இருசக்கர வாகனம் ஓட்டி வந்த நபர் ஒருவர் தனது மகளை வழியில் தடுத்து நிறுத்தி அவரிடம் பாலியல் ரீதியான சீண்டலில் ஈடுபட்டதாக குறிப்பிட்டிருந்தார். மேலும் அந்த நபர் மீது தக்க நடவடிக்கை எடுக்கும்படி அவர் அளித்த புகார் மனுவில் தெரிவித்திருந்தார். இதனடிப்படையில் அந்த காவல்நிலைய இன்ஸ்பெக்டர் சக்தி வேலாயுதம் தலைமையிலான காவல்துறையினர், அப்பகுதிக்கு சென்று அங்கிருந்த சிசிடிவி கேமரா பதிவுகளை ஆய்வு செய்துள்ளனர். சம்பவ தினத்தன்று பதிவாகிய 200க்கும் மேற்பட்ட சிசிடிவி பதிவுகள் ஆய்வு செய்யப்பட்டுள்ளது.
பாலியல் வன்கொடுமை பிரிவின் கீழ் வழக்குப்பதிவு
அதன்பின்னர் அந்த வாகனத்தின் எண் கண்டறியப்பட்டு, அதனை வைத்து அந்த இளைஞரின் விவரங்களும் அறியப்பட்டது. அதன்படி, சிறுமியிடம் சில்மிஷத்தில் ஈடுபட்ட அந்த நபர், டி.பி.சத்திரம் பூஜ்ஜி தெருவினை சேர்ந்த யோகேஸ்வரன்(24)என்பது தெரியவந்துள்ளது. இதனைத்தொடர்ந்து அவரது வீட்டிற்கு விரைந்த காவல்துறை அவரை கைது செய்தது. விசாரணையில் அந்நபர் பிரபல தொலைக்காட்சியில் பணிபுரிந்துள்ளார் என்பதும், அவரது நடவடிக்கை சரியில்லாத காரணத்தினால் பணியிலிருந்து நீக்கப்பட்டு தற்போது ஆன்லைன் உணவு டெலிவரி மற்றும் பைக் டாக்சி ஓட்டும் பணிகளை மேற்கொள்கிறார் என்றும் தெரியவந்துள்ளது. இரவுநேரங்களில் தனியாக வரும் ஏராளமான பெண்களிடம் இவர் தொடர்ந்து இதுபோன்று பாலியல் தொல்லை கொடுத்தது உறுதியான நிலையில், இவ்வழக்கானது தற்போது கீழ்ப்பாக்கம் மகளிர் காவல்நிலையத்திற்கு மாற்றப்பட்டுள்ளது. இவர்மீது பாலியல் வன்கொடுமை பிரிவின்கீழ் வழக்குப்பதிவும் செய்யப்பட்டுள்ளது.
